港股終於反彈，恒指升217點，H指升勢仲勁，大升310點，升幅2.5%，特別係內銀同保險股都有轉向之兆，航業股亦好勁，內房股也開始有勢。大市今次調整，由22672跌到21320，跌咗1352點，有好大機會已跌完。
大市雖升，但下跌股超過500隻，主要係升市偏重於指數股同中資股，股仔表現略為轉慢，但若確定升浪再起，股仔由於已有狀態，相信升勢會比上一個浪更急同更勁，恒指初步仍以前高位23000點水平為目標，整固後再上，可見25000點。
新海能源（342）昨日突有異動，午後有大盤殺到，掃上1.02元高收，大升0.10元，升幅10.8%，成交更大增兩倍至1400多萬股，一支大陽燭抽上去，一舉拋離10日線（0.94元）同20日線（0.93元），並升穿50日線（1.005元）及保歷加通道頂阻力，短線可向去年11月高位1.20元推進。
新海主要從事液化氣和電子產品銷售，近年業務發展迅速，現時正做緊「路演」，基金反應頗為正面，昨日股價急升，唔排除有基金入市同加碼。
去年12月，新海做咗一單「披成」，以每股1元配售1.92億股，比當時1.18元的股價折讓15.25%，聽聞大部份貨源落在「三大」手中，一個係中國巨無霸保險公司，一個係中國大型基金，仲有一個係外資大行。「三大」係看好公司前景，長線投資。
拓展零售時機成熟
新海現時正進行多項業務擴展計劃，包括在珠海碼頭興建多兩個新泊位，令液化氣年處理能力由100萬噸提升到160萬噸；另與加德士華南合作的8萬噸成品油倉儲項目亦會在今年內完成。至於更大規模的拓展零售計劃，時機亦已成熟，相信好快會有好消息。
09年（12月年結），不計其他收益的股東應佔溢利應有1億元，2010年可再上升到1.5億元，每股盈利15.5仙，以12倍PE計，今年股價可見1.86元，升8成。
郭兆誠