剛過了78歲生日的李香琴，上周在無綫將軍澳電視廣播城拍攝新劇《公主嫁到》期間不支暈倒，幸送院醫治後已無大礙。琴姐休息數天後於昨日復工，看來精神奕奕，問到琴姐會否考慮退休時，她說：「會唔捨得，我向來都唔係為錢只係為興趣。」甚至笑言待在家中會周身唔舒服。
上周為無綫新劇《公主嫁到》開工時不支暈倒的李香琴，昨日返電視城為《公》劇開工，眾演員送上果籃慰問，精神奕奕的她表示已沒有大礙，更直言當日暈倒都算好彩，琴姐說：「當時唔知暈所以落地都唔覺得痛，如果有知覺暈嘅話會用手就住落地，咁雙手都會受傷。」
血壓低需換藥
琴姐表示日前已覆診，她說：「噚日覆診都冇事，我有食心臟病藥同血壓丸，之前嘅血壓可能太低，家轉咗另一隻藥，醫生都叫我三、四個月就檢查一次。呢件事之後好多十幾年冇見嘅朋友都打嚟慰問，呢啲友情真係用錢都買唔到，劇中演員個個都對我好愛護。」
怕捱壞減戲份
問琴姐會否減少拍劇多休息，她說：「呢套劇拍到4月，珍姐（曾勵珍）會話畀各部門聽盡量配合o架。有人問我仲做唔做，初初都有咁諗，但係唔捨得，我呢幾日留響屋企休息，反而周身唔舒服，今日一出返嚟就冇晒事。」此外，監製梅小青表示會配合琴姐，她說：「會就住佢身體情況，為免佢辛苦暫時都cut咗佢兩集戲。」
採訪、攝影：王崇穎