一年一度嘅香港工商業獎噚日喺會展舉行，原來香港都有啲卧虎藏龍嘅公司，當中科技大獎得主恆進信息科技公司，佢生產嘅射頻識別（RFDI）產品，更擁有全球最先進技術，連美國國土安全部都係佢客戶，一啲都唔簡單。
採用恒進射頻識別
據恆進副總裁黎建宇介紹，呢個RFDI產品採用嘅技術，八達通亦有應用，但該產品應用範圍可以達10幾米距離，較第二長距離嘅摩托羅拉產品嘅兩米長好多。佢話，有調查顯示，辦公室內員工每日花喺搵文件嘅時間，佔咗6至10%，但如果每份文件加上密碼條，利用呢個產品，就可以好快搵到所需文件。美國安全部咁多機密文件，唔怪得都要用。
至於煤氣（003）就贏咗顧客服務大獎，原因之一係佢仲肯請百幾人24小時接聽電話，為客戶服務，唔使大家聽冷冰冰嘅電腦錄音指示。