保安局局長李少光狂鬧反高鐵示威者，指佢哋上星期六包圍立法會衝擊警方唔可以接受，其實示威者最想衝擊嘅係不公義、不民主制度，冇「挑逗」警方嘅意圖，仲好敬重當日一班盡忠職守嘅前線警員。有人當晚即興搞「最英俊警員」選舉，選出警隊「青春版黎明」、「翻版許志安」同埋「翻版姚明」，十分搞笑。
三位警員神情靦腆
遮打道係當晚衝突地點，警員多次噴胡椒噴霧，雙方大戰過後，百幾個示威者靜坐街頭，幾十個機動部隊警員則一字排開列成鐵馬陣，各不相讓。有示威者覺得警員職責所在為虎作倀好慘，仲要企喺度食風，於是即場搞咗個「最英俊警員」選舉緩和一下緊張氣氛，促進警民關係，等大家輕鬆吓。
警草選舉好民主，唔係小圈子選舉亦冇提名門檻，由示威者自由提名，結果揀咗三位高大英俊嘅警員做候選人，分別係「青春版黎明」、「翻版許志安」同「翻版姚明」。佢哋同名人有幾似樣，八方覺得見仁見智，不過一臉英氣、高大威猛係事實，被提名後三人神情靦腆，一味儍笑，有人用電筒照住「翻版許志安」想睇清楚佢有幾靚仔，佢仲點頭微笑，十分卡哇依。
示威者獻唱贈警草
據講呢班警員隸屬新界北快速應變部隊，03年世貿有份上陣應付韓農，係警隊精英，至於三位候選人應該都係80後，唔知當時加入警隊未。80後追求民主，不分界別以掌聲公投，喺公平公開公正嘅選舉下，由編號2666嘅「青春版黎明」勝出，全場鼓掌，呢啲真係實至名歸，幾百人選出嚟嘅煲呔，望塵莫及。
80後示威者好多係熱情澎湃嘅青春少艾，一見到「青春版黎明」當選，即刻好似fans咁湧上去要求合照，唔知係咪怕醜，「青春版黎明」即刻退落第二線，由其他同僚補位。選舉後，示威者大合唱《喜歡你》、《警察故事》送畀一班警草，警民關係如魚得水，溫馨又和諧。
重溫警草選舉可看 http://www.youtube.com/watch?v=vmhOYmRsqb0
mailto:[email protected]