周秀娜（Chrissie）出道嗰陣喺中環鬧市拍纖體廣告一剝成名，就連扮嘢宗師盧海鵬喺亞視節目都要扮佢，可見Chrissie人氣幾勁。噚日心晴行動喺奧海城舉行記者會，一班扮嘢高手盧海鵬、羅君左、寶珮如同祝文君都有嚟，原來佢哋會喺下月19同20號，喺灣仔伊館舉行兩場《疑似巨星演唱會》，齊齊扮娛樂巨星唱歌。Chrissie因為嗰段時間唔喺香港，所以只能幫手做推廣大使。
鵬哥過招
現場「真假周秀娜」第一次見面，鵬哥話：「我扮佢嗰時都唔知佢係邊個，家見佢真人，梗係靚女啦。」問鵬哥喺個唱會唔會再扮Chrissie？佢好抵死咁話：「睇吓天氣點先，太凍就唔扮。」
Chrissie話細細個已經成日睇鵬哥扮嘢，笑到食唔到飯，冇諗過佢會扮自己，Chrissie話：「鵬哥扮得我好似，好好笑，我都想扮番佢。」鵬哥聽到即刻過佢兩招：「識講粗口就得。」