反高鐵人士包圍立法會全城亢奮，被圍困嘅建制派中人有苦自己知，金勞詹當日走唔切，要由警方護送下逃到金鐘，佢噚日自詡有先見之明，預咗反高鐵80後一吹雞唔係人咁品，立法會都可能被夾攻，為免座駕被困，佢當日叫司機將架車泊喺金鐘，寧願散會後行幾步路去上車，點知最終甩唔到身。
現場消息話，其實當晚建制派議員無被「困」立法會，因為多個支持撥款嘅議員、官員都可安全步行離開，只係有部份議員堅持要揸車走，先要等警方開路，否則一早可以鬆人，因此有人指金勞詹留下似湊熱鬧居多，佢承認曾到立法會露台睇熱鬧，但一露面即俾示威者熱烈「挑逗」，佢話有人仲叫佢「笨小丑」，金勞詹見慣大場面，一笑置之。
早前聲言會辭職玩補選嘅金勞詹噚日轉軚，佢早前已同八方講，泛民玩政治手段唔係真補選，所以佢無意奉陪，又會游說議員唔支持補選撥款，等泛民辭職後冇得參選。