美股昨晚休市，但上周五道指跌100點，港股昨日跌勢未止，冇跟大陸股市反彈，走勢都算幾曳，大市成交金額縮至690億元，可見散戶入市態度審慎。
騰訊（700）昨跌5.70元，收報169.70元，似乎萬眾期待之200元目標價有些少阻滯。星俠都睇好騰訊可見200元，但股價升跌過程好考人，幾時到價唔易估，下個月、下半年、甚至下一年見200元都得，分析都係冇錯；有時市場眾口一詞，反而要留意會否出現反高潮。
紅籌股北控（392）係一個經典例子，97年剛上市股價勁飆，最高去到65元水平，當年一樣有唔少人睇北控股價見80元、甚至100元都有；可惜之後出現股災，紅籌股狂潮退卻，北控最低見過5.30元，到近年才恢復強勢。
北控近期在逆市中節節向上，昨最高曾見60.35元，收報59.75元。北控獲追捧，主要係市場睇好其燃氣及啤酒業務發展迅速，北控動力強勁，上試65元高位，似乎機會唔低。
方星俠