香港球迷最鍾意睇英超，下季大家睇波時，要留意吓英超球員身上件波衫，事關會有個中國品牌出現喺波衫上面。
取代Umbro 贊助五個球季
伯明翰環球（2309）主席楊家誠Carson，做咗英超球隊伯明翰班主後，隊波近排踢到唔識輸，噚日仲同祖國運動服裝品牌特步（1368）簽咗贊助權合約，由今年8月至2015年五個球季內，波衫會以「特步-伯明翰」（Xtep-BCFC）品牌出品，取代Umbro，而伯明翰就可收到9000萬元贊助費同價值1000萬嘅運動服裝。
家英超踢咗一半，伯明翰拎到33分排第八，華華睇番佢哋以前嘅紀錄，好大機會唔使降班，話唔定下季有機會進軍歐洲賽㖭。
華華計過，就算真係唔好彩，伯明翰下季踢完英超要降返英冠，特步使一億銀已經可以喺數以億計球迷面前，賣足九個月（英超球季）廣告宣傳，計落都唔算好貴，如果踼足五季英超，除開每年都唔使2000萬㖭！
另外，AON（怡安保險）同渣打下季將分別頂替AIG同嘉士伯，成為曼聯同利物浦嘅新贊助商，四年同樣盛惠8000萬英鎊，折算每年要成2.5億港紙。雖然伯明翰收到嘅贊助費唔及呢啲大球會一成，但以中下游球隊嚟講已經唔錯，一家便宜兩家着啦！
李華華
mailto:[email protected]