久唔久就有朋友問左丁山關於美國副學士一事，其實自己只係對加州副學士制度比較熟悉，對其他各州不甚了了。好彩教授L在美國不時提供資料，睇得多，算係知道比一般家長多一啲。教授L剛自美國傳來一篇網上文章，發表於一月八日，內容提及中部佛羅里達州大學（TheUniversityofCentralFlorida簡稱UCF，位於奧蘭多及其他地區）係全美國第三大大學，有學生五萬三千幾人。UCF在二○○六年成立一個DirectConnect（直接聯繫）計劃，向四間佛羅里達州社區學院學生保證，只要佢哋完成兩年副學士（associatedegree）學位課程，畢業後一定可以得到UCF取錄，所有中學生進入呢四間社區學院之後，只需表達進入UCF嘅意願，就會收到「入UCF保證」（當然條件係須完成副學士課程）。
呢條橋果然有效，四間社區學院（Brevard，LakeSumter，SeminoleState，Valencia）目前有超過三萬五千名學生加入咗DirectConnect計劃，去年秋季入UCF嘅五千三百三十七名轉校生（transferstudents）之中，有六成來自該計劃，參加該計劃嘅學生在修讀副學士期間，可以得到UCF學生輔導處嘅定期輔導，預先安排修讀科目，令到2+2（兩年副學士，入大學讀兩年）嘅教育過程，十分順暢。
美國社區學院與大學嘅銜接，有制度，有歷史，有經驗，而且社區學院學費比較便宜，所以畢業生轉入大學之運行十分順暢。或者有人問，咁多人讀大學，幾乎來者不拒，畢業後搵好工是否容易？梗係唔容易啦，大學畢業生嘅供應大量增加，身價自然下降，故此如果抱住有一個學位就會有好工嘅願望，已經不合時宜。讀大學，現在主要為增加知識，增強思考及研究能力，更能適應二十一世紀之知識型經濟而已，搵唔搵到好工，要睇自己嘅EQ、能力與運氣，唔好怨天怨地怨上一代。香港自有副學士之後，每年有1,853名學生爭取入讀大學，有啲大學（如城大）傾向取錄該校附屬進修學院嘅學生，有教育界人士批評唔公道。有乜唔公道呀，大學為保證收生水平，此舉有何不妥？每間大學都想盡量取錄最佳水平嘅學生，大學只收中七生，少收副學士嘅話，又有教育界人士批評對副學士不公平嘅啫！