潮媽陳慧琳去年懷上兒子劉昇時，曾大着肚為德國服裝品牌Marccain行騷，她榮升母親後，昨日再為品牌行騷，力證媽咪一樣有能力穿短裙潮靚行天橋。她更自爆以海參鹿茸響螺進補，養好身子再追生女。
香港時裝節秋冬系列昨日開始一連四天舉行，首日有本地時裝設計師鄧達智（William）和Marccain的時裝騷。鄧達智請來一班好友、名模上台，如馬詩慧、陳淑蘭、黃伊汶和Rosemary等行騷。
「生完繼續靚」
陳慧琳去年誕下兒子劉昇，昨日以媽咪級身份行騷，她穿上紫色皮褸、短裙壓軸出場，淡定行天橋，與鄧達智一同謝幕後，更笑着向台下揮揮手，她說：「大肚時行過Marccain，今次生完又再行，係生完後第一次行騷。今日本來諗住做specialguest，唔一定行，但個台好靚，唔行嘥晒，一生人唔知行得幾多次騷。」
生仔都堅持要靚要潮的陳慧琳又說：「都係呀，生完可以繼續好靚，可以着短裙，繼續行過去。」問想不想偕兒子蝦餃仔一齊母子行騷？她說：「我梗係想有佢陪我啦，不過佢係男仔BB，怕爹哋唔鍾意，佢想佢做啲man啲嘅嘢，如果太多（女仔嘢），爹哋會反對。」
拒拍母子廣告
問到會否追個虎女？陳慧琳說：「想呀，不過趕唔切，我都心急，但要調理好身體先，生咗幾個月咋，要養好身子。我都有食鹿茸、響螺、海參進補。」她謂已經推了多個要求母子合作的廣告，因為不想兒子太辛苦及多曝光。
採訪：JessicaNgan
攝影：ChanShunChing
