家陣仲講電影《魔戒》好似out咗啲，但喺《魔戒二部曲：雙城奇謀》有一幕好深刻，就係甘道夫由灰袍巫師「升呢」變白袍巫師，都先喺對頭人面前隱藏實力；而曼城前日喺英超吞愛華頓雙蛋，係文仙尼領軍以嚟首嘗敗績。睇佢呢場排陣毫無章法，賽後認衰；但呢個「盃仔王」城府甚深，話唔定學甘道夫，明日鬥曼聯時攻對方一個措手不及。
文仙尼輸波認排錯陣
前日場波，曼城一開波就有辛達告魯斯傷出，文帥急急換入羅賓奴，結果呢個巴西兵表現走晒樣，下半場早段又被換走；文帥下半場先後換入馬華路禾尼同胡禮菲臘斯，個陣都幾亂，結果就因為上半場兩個失波（派拿、沙夏）致敗。文帥賽後認衰：「我唔係魔術師，冇可能上任一個月就完全撥亂反正，我承認呢場波幾個調動都唔成功。」
睇過前日場波，有口痕友即刻話文帥蜜月期已過，大家估緊明日對曼聯場英聯盃4強首回合，莊家仲敢唔敢開曼城讓波；我就覺得會，因為文帥應付「盃仔」從來有一手，球員時代加領軍生涯，合共捧過10次意盃，教波生涯第一個錦標就係01年意盃。
文帥師承艾歷臣，而艾帥兩季前執教曼城季初贏曼聯喺英超響朵，怕且文帥有樣學樣，一早犧牲對愛華頓場波都要贏曼聯，一於平地一聲雷。特別再提泰維斯，前日踢得好水皮，但係人都記得首循環聯賽倒戈鬥曼聯忽然生猛，紅魔不得不防。
曼聯炒般尼未見精采
再講，曼聯前日贏般尼3:0場波唔見得精采，小將馬美迪奧夫埋齋個頭槌亦唔係咩金球；再講，呢個塞內加爾後生仔由曼聯外借返母會莫迪，到今個月至回歸，到底聽日場波符唔符合上陣資格都要查清楚。
曼聯喺英聯盃不嬲唔會「夫添」，呢場波將由本報名家牽牛推介，佢賣關子唔肯表態，我嚴刑逼供都撬唔開佢把口；想知佢貼乜，明日自有分解。