內銀股及內房股近期可謂難兄難弟，不約而同被內地相關措施拖低。股海升跌循環不息，家陣跑輸大市，唔代表永遠都跑輸大市，反而有時人棄我取，趁低潮期吸納優質股，他朝打壓措施放鬆，內銀股及內房股隨時再執牛耳。
星俠揀內房股，態度好「奄尖」，唔係重點城市龍頭、銷售量唔夠突出、土儲唔夠多、地價唔夠平、手頭現金唔夠多，就一定唔會揀。精挑細選之下，上市才3個多月的恒盛地產（845）肯定係星俠那杯茶。
恒盛上周五收3.15元，升2.2%。集團去年底擁土儲達1600萬平方米，上海約佔300萬平方米，上海獲國家欽點發展為國際金融中心，今年世博會就係滬市新里程的揭幕，在當地主力發展房地產，前途無可限量。
恒盛09年銷售額67.1億元人民幣，同比增加78%，今年目標超過100億元人民幣。該股現價未能反映實質價值，只要內地壓抑樓市措施逆轉，就是股價否極泰來之時，可趁低收集。
方星俠