陳淑莊，這名字你該不會陌生，大概也不會被她柔弱外表騙倒，誤以為她是弱不禁風小女子。在政壇，你不難看到她的鋒芒，她是衝鋒陷陣的角色。有人說鍾情的車款就代表車主的性格，果然陳淑莊說：「我最愛跑車」，但接着卻來個反高潮：「我想我已成為一部七人車」。
記者：趙慧敏
攝影：梁細權
隆隆聲High
當陳淑莊（Tanya）嘅眼神與200多匹馬力嘅AudiTTS接觸嘅一刻，雖然落住雨，但我都可以清楚見到佢當堂兩眼發光，一副流晒口水嘅模樣，「嘩，真係好搶眼喎！」Tanya脫口而出。自問疏於練習嘅佢對於試駕這辣跑，起初還顯得戰戰兢兢，但當坐上司機席時，卻突然車神上身般，在濕滑的馬路上，揮灑自如，見彎過彎。「聽到跑車嘅隆隆引擎聲，真係成個人都High晒，揸跑車就係要咁嘅享受。」雖然自問生手，但她覺得TTS十分適合女仔揸，尤其係軚盤及油門，控制時都得心應手，一啲都難佢唔倒。至於車身，頭燈內流線型暗燈的設計及微微隆起嘅PatPat就最啱佢口胃。夠癲夠喪嘅Tanya稱唔上車癡，但就肯定係車迷，剛踏入18歲已立即跑去考車牌，港大讀書時就不時揸住媽媽嘅座駕出出入入。「自己明明住喺灣仔，都總係要揸住架車返港大上堂，嗰時都覺得自己幾威o架，不過最慘係一泊就唔知時間，成日俾人鎖車，最終當然係要攞錢去贖車啦，家諗起都覺得自己戇居。」
年輕是跑車
現時雖然仍是無車階級，但Tanya一直想再做車主，而跑車就係終極目標，但這買車夢，永遠受身邊人所阻。「我要買車，首選當然係跑車，但就俾身邊啲人話唔實際。而且議員工作關係，經常都要攞易拉架喺街頭擺檔，呢個階段買跑車都似乎唔係咁適合。」要她以一款車款形容自己，她想也沒想便說自己是「跑車」，曾經。至於家？她說受客觀環境影響，被迫變成「七人車」。「我諗每個年輕人都覺得自己係架跑車，有衝勁，只有自己嘅世界。但人越大，照顧嘅嘢亦變多，架車載嘅唔止自己，仲有屋企人，工作。唉，希望自己唔好咁快變小巴或者巴士啦！」Tanya苦笑。不過份屬環保分子，她對鍾情嘅跑車仲有個要求：「咁大馬力只係載得兩個人，真係有啲嘥料，所以除咗耗油量低，可以載多啲人就更好。」
規格
引擎：1,984cc直四Turbo
馬力：272bhp/6,000rpm
扭力：350Nm/2,500-5,000rpm
傳動：6速S-Tronic自動波
售價：$618,000
查詢：合迪汽車（25281862）