無國界醫生噚日喺大嶼山愉景灣舉行今年嘅野外定向活動，有2,400人參加，人數創歷年新高，合共籌到220萬善款。名人邀請賽一向都係最矚目嘅，今年嘅參與者都好特別，民主黨副主席單仲偕除咗同兩個年輕黨員同組，仲拉埋太太落水，成為名人隊中嘅唯一一隊夫妻檔。
曾鈺成都好落力
話晒係兩公婆，默契自然多，現場人士話民主黨隊非常合拍，力壓其他政黨攞到第二名。民建聯老大曾鈺成都好落力，可能因為曾佢唔使連續兩日開財委會咁辛苦，落到場衝勁十足，未見絲毫疲態，帶住兩個民建聯新丁走勻全程仍然精力充沛，或者係曾太嘅愛心靚湯發揮作用，最終攞到第三。
磨拳擦掌準備參與補選嘅田二少亦首度參賽，帶住方國珊等人參加。雖然田二少戰意高昂，可惜好似選舉咁，不敵民主黨同民建聯兩大黨，田二少賽後話比賽極具挑戰，簡直同自由黨要邁向直選條路一樣咁難；但難度高還難度高，自由黨都會好似佢同班隊員咁永不放棄。至於擔任主禮嘉賓嘅梁振英就冇參賽，可能係要留番啲力氣遲啲選特首啩。