【本報訊】五區公投如箭在弦，天主教教區榮休主教陳日君樞機表態支持，他昨日再度批評政府的政改方案「遊花園」、侮辱巿民，他認為在目前的框架下普選進程難有突破，現時公民黨及社民連已經勇敢站出來，大眾應該支持，「我哋需要一個感性啲嘅、激進啲嘅方式表示我哋嘅憤怒同無奈，所以我真係希望大家可以支持呢兩個黨嘅計劃。」
記者：張嘉雯 林俊謙
陳日君昨日出席一個教會舉辦的研討會，狠批政府所謂新政改方案是「炒冷飯」，希望更多人出來表達憤怒，他認為香港巿民成熟、有紀律，有優秀的條件推行普選，「接受呢個方案係侮辱我哋自己，進步？點進步呢？進步都要講方向o架嘛，你方向都唔講出嚟，乜嘢係真嘅直選你都唔肯講，話家唔講，咁咪即係冇方向囉！」
斥高鐵是假諮詢
他指民主和民生分不開，「譬如高鐵，喺呢個制度上面呢，完全唔尊重人嘅，完全呃我哋嘅，完全唔肯諮詢，到家嗰啲都仲係假諮詢嘅，即係點可以忍受呢？」
陳日君又指公民黨及社民連現時已經勇敢站出來舉行五區公投，他表示支持，相信投票比任何民意調查更能反映出巿民真實意願，「民調係一件事，同好多人出去投票係唔同，要用啲感性啲、激進啲嘅方式表示憤怒同埋無奈。」他認為現時公投的題目清楚，正是取消功能組別，「你可能唔鍾意（黃）毓民，唔緊要，但係你知道民主係我哋大家追求嘅，佢講嘅嘢你唔使句句都認同佢，但佢呢個目標我哋一定要支持佢。」
陳日君直言被同場的社民連主席黃毓民感動，「佢話佢已經準備咗失敗，當然我哋就唔想佢失敗，我哋想佢哋成功，但係準備失敗係一個非常神聖嘅態度，我哋呢個世界上唔能夠時時期望成功，唔可以為咗成功而犧牲咗我哋嘅意義。」他深信五區公投可以帶來突破，「有用o架，有用o架，係唔同嘅，因為一個氣氛，一個情緒上嘅表現，應該有效果，就算家唔係成功，都會有效果，所以希望大家都支持公投。」
用公投成全民主
「公投唔係投呢個人，你唔鍾意佢唔緊要，你鍾唔鍾意民主？鍾唔鍾意普選？就投，投呢個人，佢代表民主，就算我點唔鍾意佢唔緊要。」他又說，在政治上，信徒的責任比神職人員更重，又指政治是眾人的事，希望信徒不要以為政治「污糟邋遢」，避而不顧。