立法會保皇派表決高鐵撥款時，開口埋口話代表廣大民意，但一步出立法會要面對具體民意嘅時候，就唔係個個都敢面對，仲驚青到匿喺立法會六粒鐘。政府其實可以提出撥款，喺立法會起一條直通地鐵站嘅天橋，再裏應外合由保皇派夾硬通過，等以後就算有幾多示威者都冇有怕，包保走得甩。
鄭汝樺匿入立法會廁所
一班保皇黨同政府官員前晚喺通過高鐵撥款後，已經諗住快閃，當中鄭汝樺去意最明顯，會後向記者讀完簡短聲明，一條問題都唔答，未夠7點已落到立法會停車場上車鬆人，一班保皇派議員就緊隨其後，上咗立法會預備嘅Van仔諗住離開。點知現場反高鐵人士群情洶湧，全部人喺車等足近兩粒鐘仲未走到，惟有返入立法會，由開完財委會到最終搞到半夜12點半，鄭局長同廿幾名保皇黨議員匿咗足足六個鐘頭，至喺大批警員護送下搭港鐵走人。
據現場記者睇住鄭汝樺黑晒面咁返入立法會後，第一時間唔係搵嘢食，而係匿入女廁。結果立法會內幾十個記者喺廁所門口等佢現身訪問，等咗大約5分鐘，局長秘書問記者想問乜，再走入廁所向局長滙報。前後搞咗近10分鐘，局長終於由廁所步出，記者問佢有乜感受，局長只係講咗句：「我喺架車度一陣間，家同議員傾吓偈。」跟手就閃咗入立法會前廳。
社民連長毛噚日講番，當晚佢喺立法會餐廳遇到主力推撥款嘅民建聯副主席劉江華，同起勢咁鬧財委會主席卿姐嘅詹培忠，兩人向長毛問咗個好關注嘅問題：「佢哋問我幾時至走得喎？」長毛跟住將問題轉述畀示威者聽，大家幾乎笑到碌地，仲一齊好幽默咁向警方大嗌「釋放鄭汝樺！釋放劉江華！」
反高鐵示威者確係有人推鐵馬、大嗌口號，但唔等於咁就唔和平、理性，當晚投票贊成通過撥款嘅葉劉淑儀，開完會單拖離開立法會，穿梭示威者當中相安無事。再講，既然政府同保皇派可以強推高鐵669億天價撥款，不妨再通過撥款起條天橋或者秘道，由立法會通去地鐵或者邊度都好，咁以後有乜事都容易甩身，完全唔使面對民意。
mailto:[email protected]