上個禮拜五一班後生仔圍完立法會意猶未盡，操上禮賓府想同煲呔直接對話，煲呔之前連斷食青年都不屑一顧，就算操到上佢屋企門口結果都係當大家透明。天主教香港教區榮休主教陳日君樞機噚日喺研討會上講起呢件事，話當晚佢由筲箕灣搭的士返堅道，點知的士司機唔識路，行咗幾次都走過咗上亞厘畢道，兜咗幾次先返到屋企，返到去發現條路封咗，即刻開電視睇吓發生乜事。
「好彩的士司機唔識路，如果車咗我去，又係一個美麗嘅誤會。」樞機把口就話擔心人誤會佢有份圍禮賓府，實質心入面把火唔知燒得幾紅，如果佢唔係就快加入80歲後，睇嚟都會操落去同班後生仔一齊開社運party。