警方家仲未拉到旺角個鏹水彈兇徒，但古天樂、鄭中基同黃百鳴噚日都去咗旺角行人專用區宣傳賀歲片《花田囍事2010》，大會諗咗條橋叫飾演皇帝嘅古仔拋繡球畀台下女士，點知古仔拖埋鄭中基（Ronald）落水，仲搞笑話女士上台可以錫古仔，男士上台可以錫Ronald喎。
最後當然係冇錫到，古仔同搶到花球嘅女士握手就算，佢事後笑笑口話冇尷尬，古仔話：「唔尷尬，不過怕真係要錫啫。」
鄭中基常行旺角
問老闆黃百鳴驚唔驚有鏹水彈從天而降？佢笑住話：「唔驚，揀最旺嘅地方宣傳先啱。」之後一班人向市民派糖，成班市民一擁而上，搞到十級混亂。
古仔話差唔多成10年冇嚟過旺角行街，反而Ronald就話自己耐唔耐都會嚟行吓，佢話：「我最多都係幾個月冇嚟，因為我鍾意玩具槍，所以成日都會嚟。」
問Ronald有冇恭喜女友蔡卓妍（阿Sa）喺前晚《勁歌》總選得獎，佢話：「我冇睇，因為喺街傾緊嘢。」提到林峯成績突飛猛進，拎埋亞太區最受歡迎香港男歌星，Ronald好驚訝咁「吓」咗一聲話：「咁返去睇完再講。」