退休生活唔代表要坐食山崩，退休人士仍然可以繼續為資產增值，就好似股神畢菲特咁，雖然年紀唔輕，但投資有道。股王A成日話，股票投資係一項退休後仍然可以做嘅工作，而且股票獲利唔使交稅，又可以令腦筋靈活。
雖然話學懂股票投資，對退休人士係好事，但敏妮就遇到一個反面教材。話說朋友F嘅爸爸已經退休，衣食住行日常生活使費都有孝順嘅朋友F負責，世伯自己又有一筆積蓄，一啲都唔使為生活擔心，只係生活苦悶冇乜細藝。由於世伯數口好，所以朋友F帶佢去相熟嘅經紀處，開咗個股票戶口，鼓勵佢學股票投資。相熟經紀可以幫手睇住世伯嘅投資，朋友F就教世伯初學炒股，只專注認識一隻股票，學睇年報、通告、相關新聞，同隻股票嘅走勢。
初初學炒股，交學費難免，後嚟漸漸對隻股票有深啲嘅認識，世伯開始有收穫。去飲早茶時，同「茶友」傾吓股票心得，過吓日辰，成個人開朗晒。不過，有日經紀同朋友F講，佢爸爸嘅注碼越嚟越大，等閒都投資幾十萬蚊。
用注碼控制風險
對一個已退休人士嚟講，投資一隻股票都幾十萬蚊，咪話唔高風險。朋友F問敏妮係咪唔應該叫爸爸學炒股？股票投資本身並沒有問題，問題係世伯貪勝不知輸，冇學識控制注碼。周末敏妮特別跟朋友F同世伯一齊飲早茶，敏妮同世伯講，「F咁孝順，個個月都畀家用，世伯唔使為生活頻撲，炒股小注怡情就好，唔使咁博噃！話晒都係過吓日辰，考吓眼光啫！」世伯好明白事理，點頭接受咗敏妮意見，仲叫朋友F同經紀講，如果日後買大咗，叫經紀唔怕提醒佢。
其實莫講話退休人士，即使係一般散戶，都應該以注碼控制風險，無謂有乜事時，自己轉唔到身嘛！
溫敏妮