財委會馬拉松式會議噚晚終於結束，泛民打拉布戰表面睇佔上風，迫使高官承認高鐵好多問題未解決，尤其係一地兩檢呢個解唔開嘅死結，唔清唔楚就畀工程夾硬上馬，真係好似賭大細。實情泛民呢仗都十分傷，開足廿幾小時會，50後、60後議員都身心俱疲，白鴿黨何俊仁前日已經作病退下最前線，社民連三子噚日戰鬥力明顯下降，涂謹申更加忽然腸胃炎，噚日屙足全日，瀉到腳軟無力拉布，只可以拉廁紙。
食得油膩急急瀉
噚晚散會後示威者包圍立法會，議員走唔到，阿涂去唔到睇醫生，惟有瞓喺議員休息室，佢同八方講，前晚喺立法會食咗炒粉同煲仔飯，可能食得油膩，返到屋企個肚已經唔舒服，捱到天光開始急瀉，但開會緊要，冇理由咁就扯白旗，死頂都要返立法會。
開會期間佢每個鐘頭去廁所一次，留喺廁所時間隨時多過坐喺議事廳，真係屙到頭暈腳軟，面青唇白講嘢都冇氣，由於唔方便離開求診，佢搵人買止瀉藥食，食藥後略為好轉，傍晚時分肚瀉逐漸停止，「要瞓低唞吓先走得。」
陰謀論者梗係懷疑有人做手腳，搞到阿涂屙到腳軟唔拉布，不過其他泛民議員冇事，阿涂話自己精神唔好可能都有關係，總之病從口入，噚日佢唔敢亂食嘢，只係食粥，希望休息一、兩日無事。
保皇過政府一戙
阿涂疑似食錯嘢出事，法律超人謝偉俊則可能食錯藥，噚日泛民提出多項動議盡最後努力拉布，謝超人都加入拉布行列，提出動議要求政府做啲嘢，以示接納反高鐵人士意見，承諾重視民意。泛民拉布十幾廿個鐘，唔差在謝超人拉多幾分鐘布，最無厘頭係謝超人提出動議卻投票反對自己個動議，其他泛民一陣起哄，唔知佢搞乜鬼。
保皇黨有理無理，一於反對到底，之不過反對呢個動議，即係象徵政府唔重視民意、唔接納反對聲音，變相過咗政府一戙，明畀自己友玩又冇得出聲，鄭汝樺面色一沉，硬食一嘢。
mailto:[email protected]