反高鐵快樂抗爭暫告一段落，菜園村民炮製鄉土美食帶到中環，畀反高鐵人士品嚐農家風味，前日傍晚有人送咗100碗魚蛋粉到遮打花園畀反高鐵人士醫肚，呢位有心人原來係瀝源邨盛記大牌檔老闆B哥張文強，佢話請食魚蛋粉係小事，不足掛齒。
盛記係地區名店，金牌運動員阿寶都係常客，長毛亦不時幫襯，B哥碗魚蛋粉唔只有心，仲充滿悲情，事關盛記面對領匯大幅加租，租約今年3月到期後，唔知仲可唔可以做落去，半世紀歷史大牌檔可能就此結束。講多兩句，B哥不勝欷歔咁話，睇新聞見到菜園村因高鐵被鏟平，回想自己個大牌檔都可能同一命運，真係感同身受。