近排天氣時冷時熱，一唔小心好易中招，小妹個同事翁小姐就無端端冇返工，嚇得我以為佢染咗豬流感，咪好心send個短訊慰問下佢囉。點知佢轉頭就打電話嚟，大鬧我黑心。原來佢最近行街shopping，見到護膚品大減價，就貪平買埋一大堆，點知搽咗之後，第二朝塊面就變成阿凡達咁。佢份人愛靚唔愛命，又點敢出街見人呢？
小妹見佢咁慘，就幫佢請教吓消委會嘅老友點解救。根據老友話，市面上有啲潤膚產品嘅成份係會引致皮膚敏感嘅，例如乳酸銨可能會令皮膚泛紅，羊毛脂同埋鯨蠟醇，都容易引起皮膚過敏，買之前應該留意產品標籤，一向敏感嘅人就更加唔好用含色素同香料添加物嘅產品。
眼霜水份較多
老友又話，身體唔同部位嘅皮膚厚薄唔同，對護膚品吸收力唔同，應該用唔同性質嘅潤膚霜。例如眼部皮膚最薄，市面上一啲特別指明用於眼部嘅眼霜，通常都係水份較多，成份亦低敏，減少對眼部刺激和避免堵塞毛孔。至於面霜同手霜，大部份係油份相對較重嘅乳霜，因為保護和滋潤性較強。總之買護膚品，一定要睇清楚，唔好一味貪平。
電郵：mailto:[email protected]