當法師遇上風水師，又是風雲變幻時。
自言最忌馬的司徒法正，偏偏在叢林中撞正馬女麥玲玲，還以為誓必張羅列陣各師各法，誰知法正師傅沒打鑼大叫「出事o架嘛」，反而對麥玲玲憐香惜玉，高帽笠到兩層高。情到濃時，同場加演一幕武松打虎，有幾邪門？自己睇啦。
這場大龍鳳沒開壇沒符咒，卻產生化學作用，爆出不少歡笑聲，其間麥玲玲竟斗膽直指司徒法正的符咒能醫不自醫。
撰文：比華利
人夾人緣，生肖也有相旺及相冲之分，61歲肖鼠的司徒法正坦言最忌馬人，偏偏身伴得力女助手肖馬居多，他深信自己命硬足以「食」住馬女，與麥玲玲對對碰傾談，竟發現她是43歲的馬女，司徒法正立即以師傅口脗說：「今次真係冲出火花。」
逢賭必輸志在派錢
司徒法正和麥玲玲年前齊齊為有線靈異節目《怪談》到台灣拍外景，朝夕相對下發現大家很夾，麥玲玲更大爆司徒法正鮮為人知的秘密，她熟不拘禮地說：「佢係天生購物狂，我去狂買水份面膜，佢係咪都跟住買，我買幾多，佢又照跟，我最初以為佢買畀屋企人，原來佢話要自用，真係俾佢激死。」
未知司徒法正是否將荷包裏的錢花盡掃貨，輪到他請工作人員食飯時，麥玲玲指他不停致電當地師兄弟求救，眾師兄弟可能早算到有財劫，紛紛避聽電話，麥玲玲笑說：「最終佢要自己掏腰包請客，佢唔係孤寒，佢貪玩啫。」她又大爆司徒法正愛跟朋友玩話事啤，但志在參與，從未施法佈局生財，多數輸乾輸淨散場，麥玲玲說：「佢同朋友玩唔志在贏，反而鍾意向牌友派錢，吓吓上落都七、八千，佢其實乘機派錢，等大家開心。」
相由心生，成日笑騎騎的司徒法正指自己與麥玲玲都是笑臉人，他說：「我覺得玲玲笑臉好親切，講嘢講唔停似隻雀，佢喺堪輿界都算有代表性，計吓佢都做咗咁耐，我覺得佢有料o架，否則呃一年飯食就俾人踢走啦。」
風水命理有不同派別，麥玲玲乃根據數據和面相推斷運程，司徒法正的法科則源出道教，主要用精神力量及符咒，透過法事邀請鬼神加運。兩派施法不一，卻互相尊重，麥玲玲和司徒法正也惺惺相惜，問麥玲玲可會對法科的施術和法事有所質疑，她說：「法科好多時變化上落較大，做一場法事會可以好快達到預期效果，雖然有效率，但維持時間相應會比較短。」
作法前必齋戒三天
麥玲玲又指法科霸道，她說：「佢哋作法要開壇寫符，比較偏門，法科嘅師傅好講究佢嘅精神狀態同經驗，有時做一場法事真係要搏晒命，精神差啲都頂唔住。」司徒法正累積多年法科經驗，他為求法力持久，作法後多會馬上替善信佈局配合。近期爆紅的司徒法正經常被追問入門之道，他指法術人人皆可學，竅門在於心術要正，邪門便不可入侵。
司徒法正擅於寫符作法，每次開壇前最少齋戒沐浴三天淨身，不過他的符是否靈驗則見仁見智，麥玲玲曾親眼目睹竹戰精關寶慧多次在趕開枱前，向司徒法正索符造勢，雖未算萬試萬靈，但總有斬獲。司徒法正聽後笑而不語，但他也承認曾有作法失敗個案，他說：「我試過替瀕臨分手嘅夫妻作法求和合，做完場法事，幫佢哋佈好撮合局，但佢哋就冇忍讓配合，結果最後離婚收場，我覺得好可惜。」
尚有半個月便是虎年，麥玲玲為司徒法正測運程，她說：「肖鼠虎年與太歲相合，虎年會有好多外出發展機會，我建議佢出門要多加注意，慎防跌財。」至於司徒法正則提示馬女麥玲玲要慎言，他說：「玲玲太紅，佢要心平氣和處理所有問題，否則好易惹口舌之爭。」
童心未泯玩打肚腩
多行善便可積福擋煞，麥玲玲將做瘦身代言人的酬金捐出做善事，成功減掉18磅贅肉的她，40G重量級上圍堅挺如昔，她自豪地說：「其實脂肪都只係積聚喺腰部為主，呢次減肥療程針對改善身形，可以維持腰瘦胸唔減嘅效果。」現場見她的26吋腰圍，與司徒法正的35吋水桶腰相映成趣，整裝期間，麥玲玲手多多將司徒法正的大肚腩當鼓打，難得司徒法正毫不介意，還不時哈哈大笑。不過他卻無意瘦身減腩，司徒法正說：「唔知我減咗好唔好睇，做人開心就得。」
虎年娛圈大預言
風水預言，信不信由你。娛樂圈去年發生不少大事件，麥玲玲和司徒法正提早在虎年前作出10大預言，提醒藝人趨吉避凶，希望大家可以過一個開心暢順的虎年，而不是是非纏身的「苦」年。
－司徒法正－
華仔冇緣做老竇
1.虎年娛圈有藝人名模吸毒，卦象中見勾陳、白虎同朱雀三凶神當位，三者分別代表牢獄、官非口舌同暗事，特別以姓吳、劉同梁嘅藝人較易出事，宜加注意。
2.周杰倫近日被爆暗交林志玲，但依女方命格位處太陰，亦代表暗私之事，所以佢哋適宜發展地下情，不過戀情唔穩定，好快玩完。
3.已有兩女嘅千億新抱徐子淇，雖然一直恨替李家添男丁，但佢嘅卦象中子孫爻均為陰，若虎年生B大多數仍係女，要生男B睇嚟仍需努力。
4.梁洛施幫富豪男友李澤楷生咗個仔李長治，雖然未正式入門，但佢屬元胎格，虎年有好大機會再傳出喜訊。
5.已留醫四個多月嘅賭王何鴻燊，虎年身上未見有凶星，如果多啲祈福，健康運會提升。
6.郭富城同熊黛林嘅戀情係公開秘密，肖蛇嘅城城同肖雞嘅熊黛林喺虎年六合不現，有機會分手。
7.上年婚姻傳亮紅燈嘅陳奕迅同徐濠縈，二人命主陰神，上有太陰同代表驚恐的滕蛇在位，有可能夫婦出現面和心不和情況。
8.謝安琪同張繼聰夫婦嘅卦中未見冲剋，女方命上見玄武當位，事業會遜色，反而男方命中見貴人，事業會有更大發展空間。
9.恨仔嘅劉德華同太太朱麗倩嘅卦中冇子孫爻，同時亦冇喜神或胎格，虎年暫無望升格做父母。
10.虎年係庚寅年，大勢嚟講有利資深歌手同演員，特別旺姓鍾、古、梁同楊嘅藝人，全名中有草花頭、木、十、金同水部嘅藝人都會升呢。
－麥玲玲－
情慾片大收旺場
1.電影業發展平平，惟獨情慾片可以突圍。但虎年有一白桃花星入兌宮，兌宮代表娛樂圈，令情慾元素強烈嘅電影大收旺場。
2.一白星又有重生嘅意象，而兌宮亦象徵少女，故今年大利新人上位，尤其係年輕女生，若名字有女字旁則旺人氣，可望成功跑出。
3.庚寅虎年庚象徵刀劍，打鬥之事也多，娛樂圈則會勁吹整容風氣，接受過整容手術嘅藝人會勇於直認。
4.因盲年不利嫁娶，娛樂圈嘅結婚喜事會減少，正桃花唔易開花結果。屢傳婚訊嘅章子怡，今年嘅姻緣都只屬拖泥帶水，未能修成正果。
5.因立春八字見「卯、酉」，代表不正桃花大旺，藝人三角關係或地下情等新聞將霸佔娛樂頭條。
6.娛樂圈中姓楊嘅藝人運氣特別好，加上楊怡流年有四吉星入主，今年佢嘅演藝事業會扶搖直上。
7.肖蛇今年與太歲相刑，與「蛇」同音者也屬犯太歲。佘詩曼嘅名既犯太歲，又因為本身流年易有感情糾紛，今年是非口舌特別多。
8.肖豬今年與太歲相合，尤其71年出生者更加係踏入人生關口，屬豬嘅陳豪正是代表。今年特別有利結婚、置業、添丁或開店等重大決定，否則容易有負面的衝擊。
9.猴人虎年冲太歲，但藝人越冲越旺，故冲太歲之年往往越變越好。謝霆鋒同鍾欣桐都會出現正面嘅改變，對佢哋嘅發展有良好影響。
10.去年被踢爆瞞婚嘅劉德華，今年遇貴人吉星入主，加上有正桃花紅鸞相助，人緣會變佳，受歡迎程度得以回升。
武松上身唔肯換衫
堪輿師大都講究形象，向來愛以行政套裝示人的麥玲玲，日前難得卸下粉紅套裝，為配襯一套三件的虎紋頭箍、煲呔和長尾巴，她穿上一身黃色衣物，搖身變成俏虎女，與穿上黑色武松裝的司徒法正，在公園上演一幕搞笑版武松打虎。
圍觀者爆笑
兩位師傅都有豐富幕前演出經驗，要扮鬼扮馬完全難不到他們，二人這次更樂得放下嚴肅的一面，搞笑一番。司徒法正變身武松後，在鏡頭前擺出追打虎女麥玲玲的連環甫士，一邊作狀出拳，一邊念念有詞：「我打死你。」如開壇捉鬼一樣肉緊兼逼真，非常好戲。
相反麥玲玲雖不肯認輸，卻十分貪靚，全程在鏡頭前保持儀態，不過最後終忍不住張牙舞爪向司徒法正還擊，他則有風度地忍讓，更主動屈膝下跪，甘願被虎女扭耳仔，兩人抵死地各執雨傘對峙的場面，引得圍觀者紛紛爆笑。
拍照完畢，麥玲玲和司徒法正都不願立即換衫，似乎真的扮嘢扮上癮，司徒法正搶着說：「好得意，平時我好少扮嘢，其實放低嚴肅一面將歡樂帶畀大家都幾好。」麥玲玲也認同說：「咁嘅打扮對我嚟講好突破，堪輿師都係幫人解困，我哋呢次搞笑可以令大家開心都唔錯吖。」
話你知：頭髮指甲種生基
司徒法正自從為華懋小甜甜龔如心遺產案出任法科風水專家證人後升呢，更曾聲稱為賭王何鴻燊種生基。雖然不少人對種生基趨之若鶩，但因費用不低，普羅大眾似乎難以負擔，司徒法正謂近日推出8,800元平民價種生基套餐，在粉嶺風水地黃帝祠進行，本月24日便有種生基法事。
提到種生基的程序，司徒法正指每位善信要自備時辰八字、一撮頭髮、一點指甲、一粒金、一粒玉和一個刻有心經的金香爐，然後由司徒法正開壇為善信作法，他說：「我會同每位善信作法約15到20分鐘，所以一個鐘最多幫四個，都好花精力。」他指稱善信種生基後不但可招財，還會加強運氣。
後記：玄法合一過肥年
麥玲玲和司徒法正為本報拍攝武松打虎照，雖然兩人各有捧場客，看似大纜扯唔埋，但經短短兩個多小時合作，小記發現兩位師傅真的很夾，全程雞啄唔斷，更即場度出搵錢大計，麥玲玲建議推出玄學擺設，然後交由司徒法正開光，加強效果，他們更希望打鐵趁熱，農曆新年前可促成合作，齊齊銀過肥年。
