【本報訊】捱過沙士，挺過金融風暴、豬流感，敵不住兩樽鏹水彈震散「廟街平民夜總會」，露天食肆首當其衝生意大跌三成。位於廟街街頭的老牌煲仔飯菜館為抗鏹水彈，加足火力炭燒煲仔催谷飯香誘老饕入街，密鑼緊鼓研製豬軟骨新派煲仔飯吸潮人；位於廟街街尾的傳統海鮮店與潮州打冷Crossover，首次公開秘製去骨鵝頸肉搶生客。 記者：蔡朗清
傍晚時分，油麻地港鐵站出口的廟街街頭，空氣中飄蕩煲仔飯的飯香，夾雜臘味、滑雞，誘得在寒風中踱步的過路人口水直流。原來逾30年歷史的興記菜館開足數十個煤氣及炭爐猛燒煲仔飯，但過去舖前馬路擺滿數十張摺枱的熱鬧場面不復見。興記第二代掌門人，人稱陳大姐的陳國英表示，早幾天廟街發生鏹水彈事件，殺傷力更甚於金融風暴、豬流感，人流即時減少，生意大跌，「我哋平均每日賣1,000煲仔飯，家得約600煲。」
熟客「冒死」光顧
陳大姐苦笑說，幸好鏹水彈炸不走熟客，連日仍有不少熟客光顧，「佢哋仲講笑話冒險嚟食，有冇嘢送；我咪回敬佢哋話我要冒險開檔。」面對鏹水彈效應，陳大姐已收起街上摺枱以增加食客信心，「我哋安排番啲客人入店食。」
她又說，興記煲仔飯平通全港，價錢減無可減，「好似排骨、滑雞等煲仔飯，賣到18蚊一煲，外邊起碼賣25蚊。」但她透露正密鑼緊鼓研製新派煲仔飯，去年創出雞軟骨、鴨舌煲仔飯，深受潮人歡迎，「傳統嘅煲仔飯都要求變，之前我食過豬軟骨米線，家試緊點樣將豬軟骨放喺煲仔飯度。」她說，最重要警方盡快緝捕鏹水彈狂徒，才能完全恢復巿民到廟街街頭食煲仔飯信心。
興記菜館
撚手菜式：滑雞煲仔飯（$18）、排骨煲仔飯（$18）、鱆魚肉粒煲仔飯（$25）、雞軟骨煲仔飯（$30）、鴨舌煲仔飯（$40）、香煎蠔餅（$20/細）
地址：廟街15、19及21號
查詢：23843647
天剛入黑，佐敦港鐵站出口的廟街街尾，人流出奇地少，座落早前鏹水彈原爆中心的香港仔海鮮小菜館，老闆楊小姐大嘆連日生意少了三分一，「呢條行人專區（廟街與南京街）原本好熱鬧，擺滿晒枱凳，發生咗鏹水彈事件，條街靜咗好多，我哋都唔敢擺枱喺冇簷篷啲地方。晚巿生意仲差過豬流感嗰陣。」
楊小姐稱，近年食肆將避風塘海鮮與潮州打冷Crossover，全廟街只此一家；而營業時間更由傍晚5時至翌晨6時，通宵打冷客未受鏹水彈事件影響。
蝦、蟹要新鮮才好吃，為減低鏹水彈殺傷力，楊老闆冒着寒冷每朝清晨5時往魚巿場揀海鮮，招牌菜椒鹽瀨尿蝦、避風塘炒蟹最受客人歡迎。潮州打冷則由入廚20多年的陳志文負責，當中以秘製滷水鵝片、潮州拼盤最熱賣。
秘製去骨鵝頸肉
為增加賣點，陳志文首次向傳媒公開餐牌也沒有列出，以往只留給熟客的去骨鵝頸肉。陳師傅說，鵝頭頸是滷水鵝中的極品，因鵝身體積大，吊起鵝身浸煮滷水，鵝頸會最入味，「其他食肆會將鵝頸連骨斬畀客人，但我哋會起晒骨，只剩鵝頸肉畀客食，肉質比鵝片滑好多。家喺香港，冇乜師傅識得鵝頸肉起骨秘技。」他說，兩條鵝頸只能做一碟去骨鵝頸肉，過去只留給熟客，現在歡迎所有客人點食。
香港仔海鮮小菜館
撚手菜式：椒鹽瀨尿蝦（$70-$100）、避風塘炒蟹（$150-$180）、滷水鵝片（$65/例牌）、潮州拼盤（65元/例牌）、去骨鵝頸肉（$80）
地址：吳松街105號地下（南京街）
查詢：23843226