以下問題，哪條最難答？
A.我有冇得醫？
B.點解我咁乖都會有絕症？
C.我仲有幾耐命？
D.咁係咪即係等死？
人生詰問，臨床腫瘤科醫生張明智覺得條條艱深，偏偏病人當他是神仙，每天在診所內解答善男信女的難題，難題之最，他選B：「點解我咁乖，唔煙唔酒都會有癌？」
「人類好靠科學，覺得自己能力好大，㩒個掣就乜都做得到，但係其實有啲嘢唔係有光纖、有電腦就可以解決；有啲嘢醫學上解釋唔到，醫生知道引發癌病嘅因素其實只係冰山一角。」張明智說，現代人難以接受患上絕症，「因為大家覺得醫學昌明，樣樣都醫得好，但原來好多病都醫唔到，好似糖尿病、心臟病、腎病，都係醫唔好，只能夠控制住。」
伴隨而來的問題，相信非「點解偏偏選中我？」莫屬，「我會同病人講，佢哋唔係唯一一個遇到咁嘅命運，癌症每三、四個人就有一個，當中有三分一人有擴散，其實好普遍。」慣看老病生死，他相信命運，「人嘅壽命幾十年，控制到嘅嘢其實唔係咁多，最有能力、最有錢嘅人都有控制唔到嘅嘢，我自己好接受，冇辦法。」
盡量開心每一天
次等難題，他選C「我仲有幾耐命？」，這條問題原來有modelanswer，「中位數肝癌就九個月、擴散乳癌兩至三年、腸癌一至兩年，不過justanidea，有啲人九個月，有啲人得一個月，有啲人標靶治療好有效，幾年都冇事。」
他深感社會生活緊張，每個人都執着數字，對健康的人、患病的人，他的勸告是盡快停下來，「唔好再掛住呢啲嘢，因為你唔知幾時會有病，每一日都盡可能開心啲，唔好為將來諗得太遙遠，我見過好多死慳死抵、做嘢做得好辛苦，諗住第日退休享福嘅人，到佢享福嗰陣，就發現自己有病。」
張明智熱愛音樂，從小習琴，鋼琴造詣達演奏級，離開診所、離開醫院，他用音樂來忘記人世苦難，最近更出書記錄工作點滴，內附處女唱片《鋼琴心曲》，出碟的動力，原來是來自一位患癌後學古箏的病人，「呢刻想做乜盡量做，我都會勸病人，想去旅行、探吓遠方嘅親友就去，唔好成日掛住賺錢，唔好成日掛住諗10年之後嘅生活，與其活到200、300歲，不如接受人只係有幾十年命，好好活出呢幾十年。」
記者 張嘉雯