中國消防（445）淨現金上7億銀，加埋有位超級大孖沙股東，有得諗。中國消防主打祖國消防車、消防設備系統產銷及安裝，股東之一為市值過千億銀計嘅「聯合工業」，實力唔嘢小。又中國消防手頭淨現金相當於每股70%，係超級現金牛。
中國消防09年半年度（6月底止）業績，又係因為金融海嘯，見紅近4000萬銀人仔，相信全年度亦唔慌靚仔。但要咁睇，祖國樓市中線前景睇好，加埋商業樓宇越起越多兼越高，對消防設備及各類型消防車需求只會有增無減，中國消防應該越做越肥仔。
中國消防2010年度純利，係咁意重返08年度8000萬銀人仔水位，預期PE都係得11倍。呢轉博中國消防上番NAV水位，價見0.55元，現價0.36元講緊翻半番。
看通殘到離晒譜
看通集團（1059）09年度純利倒退5成，但往績PE都係得12倍，就當2010年度PE都係呢個數，唔係貴。但看通有祖國市場backup，業績要回升，冇難度。又看通現價0.202元，講緊貼近04年頭沙士復蘇期低位，相對NAV0.54元折讓63%，殘得離晒譜。呢轉短打，博看通升20%到0.24元，看通嘅折讓，講緊仲高達55%，實情仲有大巴折讓收窄空間。
錢雋