在黃金海岸玩咗三日，馬主H就要趕返香港，預備開工，上星期五晨早五時起床，六點鐘上小巴，由神奇百萬拍賣會派司機送佢與馬主M一齊返港，其他人就在星期日先至打道回府。是日無直航班機，兩人要到布里斯班乘機到雪梨轉機返香港，一路直至香港時間下午六時（黃金海岸下午八時）先至到達赤鱲角，用咗十五小時。唔好話唔辛苦。馬主H買咗半斤昆士蘭荔枝，半打芒果返屋企，點知打開之後，四隻芒果已在飛機艙內焗熟咗，幾乎爛晒，甚為無癮。
吃晚飯之際，原來電視直播立法會財務委員會辯論高鐵撥款，泛民大打拉布，問完又問，沒完沒了，自不然搞到夠晒鐘。用咁嘅方法，財委會都唔知開會開到幾時先至可以就撥款投票。馬主H與一班馬主都係支持派，認為興建高鐵合乎香港長遠整體利益，碰啱馬主M亦係工程師學會會員，馬主M全面贊同香港工程師學會之高鐵專責小組之觀點，認為公共專業聯盟提出之錦上路方案內容甚多工程技術考慮不足之處，並不可行。而佢哋對「錦上路方案」造價可以慳好多之說，一致認為不可接受，質疑公盟可能估價不足。此乃工程師學會之整體意見，如果有人話唔信工程師學會嘅專業意見，而相信一班為咗一個目的而臨時召集走埋一齊之人，無話可說。
眾位馬主之中，有商人、有旅行社東主、有律師、有出版界高人、有工程師，眾人（不代表馬主協會）一致支持高鐵，用潮流術語講，使唔使申報利益呀？出版界高人講：「總之公開自己之職業就得啦，譬如講西九文化區，高志森企硬支持，當然係代表佢自己業界利益，唔通你唔畀高志森在西九發展發表意見咩。譬如工程師學會，支持興建高鐵，佢哋認為工程技術可行，你都唔能夠抹殺佢哋意見嘅啫。電影界得到政府支援，成立一億元電影基金，你話啲導演、演員唔去支持爭取咩。」
香港政界有個清潔癖，洗白白要白過白色，在中國最崇拜之美國，夠晒民主喇啩？工會代表為咗醫療改革法案直情入白宮見奧巴馬爭取利益，工會以前又捐過好多好多錢畀奧巴馬競選總統，佢哋究竟有冇利益衝突？現實政治就是如此，奧巴馬競選之時，成日講改革（change），充滿理想，到入主白宮之後，做事作風與以前白宮主人毫無分別！在高鐵問題上，所有香港人都係持份者，人人可以發言，不能話邊個有利益衝突就因人廢言。