娛樂圈近日喜事重重，繼范姜日前為鍾鎮濤誕千金後，郭可盈前日也在丈夫林文龍陪同下，開刀產下7磅2安士的千金。初為人父的林文龍昨日喜孜孜地表示心情興奮到十世難忘，他在產房陪產時感動到流下男兒淚，並承諾日後將會更加愛錫太太，跟太太及B女三位一體。
郭可盈與42歲林文龍結婚5年終開花結果，現年40歲的她前日在舊山頂道嘉諾撒醫院擇日產女，B女重7磅2安士，母女平安。林文龍昨日向傳媒發放了3張抱着愛女的照片，小B女深得父母遺傳，樣子長得精緻可愛。
首做爹哋十世難忘
記者昨日致電恭賀林文龍，初為人父的他仍難掩興奮心情說：「BB同媽咪嘅情況都verygood，可盈係擇日開刀嘅，醫生話佢比一般媽咪嘅康復狀況仲快。之前揀咗幾個日子，諗住視乎BB情況開刀，咁啱噚日情況許可，所以就揀咗噚日，我都有陪老婆入產房。」見到太太開刀生產過程時可感驚怕？林文龍說：「點會，一個係老婆，一個係自己個女，嗰陣時心情好緊張好興奮，始終第一次做爹哋。」是否感到一世難忘？林文龍笑道：「點止一世，直情係十世難忘啦。」
林文龍透露可盈會餵人奶，記者問到B女似可盈還是父親時，他說：「我唔識睇，兩個都似，但啲醫護人員話嘴仔似媽咪，眼仔同鼻仔就似我。其實BB輪廓慢慢就會唔同，似邊個都咁開心。」會否獎勵太太？林文龍感慨地說：「可盈將自己所有嘢無條件咁攞出嚟，我日後會更加愛錫佢。嚟緊我會休息幾個月陪老婆同BB，呢個時候就算有人出幾多錢畀我，我都唔會接job，我要幫手湊BB。做咗父母必須留喺BB身邊，會陪太太留喺屋企坐月，加埋我哋都係新手，要多少時間熟習吓點照顧BB。」
「冇嘢比BB更重要」
可盈產後林文龍一直陪伴在側，忙得不亦樂乎，昨日下午他在醫院外接受記者訪問，大談初為人父感受，他提到雖然早有心理準備，但入到產房內陪產時仍感動到流下男兒淚，他說：「之前睇住太太懷孕咁多個月，以為自己有晒心理準備，但係喺BB出世前一晚，我同老婆已經好感動。老婆仲話BB喺肚入面陪咗自己9個月，唔捨得佢出嚟，呢樣我真係體會唔到。但係到BB臨出世就真係忍唔住，覺得好偉大同好神奇，冇乜嘢比BB更加重要，冇人可以代替到佢。」
至於B女名字，林文龍表示仍未改名，他說：「仲研究緊，搵咗啲師傅畀意見。自己都諗咗好多好聽嘅，但係加埋姓氏組合個效果就唔同，所以仲未諗到十分滿意嘅。」他又笑稱希望再追一個：「有咁嘅打算，主要都係視乎太太嘅回復狀況，但係兩個夠喇。」問會否叫太太專心湊B不要再接工作？林文龍說：「一早好希望佢多啲時間留喺屋企，佢如果唔係事業心咁強，生完BB之後梗係想佢多啲時間湊BB啦。」
B哥爆范姜好胃口
郭可盈與林文龍榮升父母，身邊不少好友均戥二人高興，好姨薛家燕昨在電話中說：「個BB似爹哋媽咪，應該好精靈好靚女，遲啲等BB滿月之後，我會約埋《富貴門》啲同事探佢哋。」身在內地工作的洪天明原來還不知道好友林文龍已做老竇，他驚喜地說：「吓？生咗啦？我梗係會祝福佢哋同BB啦，遲啲會補送禮物畀BB。」
至於早前再做老竇的B哥鍾鎮濤，昨日到養和探望為他誕下女兒的女友范姜。B哥表示有幫手餵囡囡，更自稱是熟手，至於范姜情況，B哥說：「可以落床喇，好好胃口，不過因為佢要餵人奶，所以唔可以食得咁雜。」B哥又講笑稱為女兒取名鍾三，其後他才認真說：「要夾八字，搵師傅夾緊。今日鍾懿拎咗隻CD返學校畀校長聽，遲啲仲想做一隻MV紀念㖭。」鍾懿下午則由傭人帶到醫院探望媽咪和初生妹妹。
採訪、攝影：藍文浩、比華利、何慧斯、黃偉雄
相士話：牛女利父母緣
郭可盈擇日為丈夫林文龍剖腹誕下B女，據堪輿學家楊天命批算，B女命格屬木，加上冬天出世，財運極旺，他昨日在電話中說：「佢嘅命格好好，屬傷官生財格，BB本身嘅財星好旺，細個會先旺爹哋，大個會旺媽咪，而且父母宮相合，同父母緣份好好。BB女好聰明，將來適合從事表演或者一啲同人接觸嘅行業。佢係木火運，所以會有60年大運行。」楊師傅又批言BB需特別注意腸胃。
星級BB：牛仔牛女熱爆娛圈
恭賀文龍可盈榮升父母！過去一年都有不少藝人造人成功，從BB的歡顏照片也可感受到父母的喜悅。
今年1月12日
父：鍾鎮濤 母：范姜
Eloise重8磅2安士，擁有小酒窩，肥白可愛。
09年10月8日
父：Ted 母：李樂詩
順產誕下6磅8安士兒子，出生後接受割包皮手術。
09年9月3日
父：胡諾言 母：陳琪
剖腹誕下重7磅4安士的女兒芷苓，囡囡嘴仔似媽咪。
09年7月9日
父：劉建浩 母：陳慧琳
剖腹誕下6磅蝦餃仔劉昇眼大鼻高，頭髮濃密似老竇。
09年5月16日
父：李家誠 母：徐子淇
剖腹誕下重6.5磅女兒晞兒，子淇笑她肥到似鄭則士。
09年4月26日
父：李澤楷 母：梁洛施
在加拿大誕下7磅兒子李長治，面形與父親儼如餅印。
09年4月20日
父：林祖輝 母：姚嘉妮
順產誕下6磅半女兒Kyra，手長腳長似足媽咪。
資料來源：《蘋果》資料室
