【本報訊】鐵路工程如箭在弦，還未動工先把香港裂成兩半，他們說是高鐵，他們說是低鐵；一方指摘拉布，一方狠批強權；你求飯碗，我保家園；這邊廂展現本土經濟、諷刺社會時弊，吟詩作對唱歌仔，那邊廂瞬即抄橋，無厘頭舞龍、「唔啦更」艷舞，光怪陸離形神不備。決戰前夕，立法會外兩陣對壘，延續議事堂內的硬仗。
記者：張嘉雯、雷子樂
每天行動、每天開花、每天結果，「三日兩夜官僚O嘴高鐵抗爭嘉年華」走到第二天，立法會外再次繁花盛放。師奶摩打手包餃子，嬸嬸拚命煎蘿蔔糕，點點滴滴潤澤每顆灼熱心靈，車衣的陳師奶來了，深水埗的潘伯來了，賣花生醬的姊妹來了，不同的出發點，同一個目的地，百姓口袋內的669億，豈是議事堂內可獨斷橫行的事？反抗強權，我們來了。
外國遊客認同抗爭
抗爭中堅菜園村居民昨日再次施展鄉土魔法，茶果、鹹湯丸、蘿蔔糕陸續上場，攤位外人人一手抗爭特刊，一手熱辣美食，高峯期有數十人排隊，不少外國遊客加入排隊行列，來自加拿大的JenniferTeichman大讚食品地道又美味，也由此了解反高鐵行動，對年輕人大表支持。
Polly與一眾師奶由屯門遠道來中環，售賣回收二次油做的肥皂，她最恨政府罔顧環保，口口聲聲保護藍天，卻又大興土木，不停展開基建，「係咁破壞環境，搞到周圍都係垃圾，唔顧我哋基層嘅感受，為咗慳嗰幾分鐘，嘥多幾百億。」
要數人情味，深水埗重建區街坊數一數二，做花牌的黃乃忠及當花王的潘伯昨日幫手篤魚蛋、包砵仔糕。他們在「發展」的大前提下家園被毀，各散東西，街坊Maggie說大家對政府當年「大石砸死蟹」痛心疾首，對菜園村居民的遭遇身同感受，也與當年幫助他們、今次的苦行者、反高鐵的80後成為好友，「輸贏唔係嗰一刻，每日行動，每日都開緊花，每日結果，當日如果唔係感動咗班年輕人，佢哋今日唔會出嚟，我哋係積聚緊力量，希望將力量留畀其他重建區。」
來自灣仔的陳師奶，本身是家庭主婦，又是「天衣無縫衣車隊」的成員，製作布袋幫補家計，又會教授烹飪班、家政，她說本土經濟也可以餬口，不一定要起高鐵，「要嘥咁多錢，香港咁多窮人唔幫，好多阿婆兩餐冇餐飽，要執報紙、汽水罐。」她欣賞年輕人的熱誠，「唔可以任得啲高官想點就點，唔可以任得啲商家想點就點，呢世界係佢哋嘅，我哋都幾十歲，年輕人係要出嚟。」
反高鐵街訪
「我哋有三、四十人來到，學生會最不滿嘅係，點解高鐵方案仲有咁多爭議，政府、保皇黨同功能組別議員都要表決通過，我哋好質疑呢啲議員可唔可以代表到香港人。」
「我好欣賞反高鐵陣營嘅連串行動，尤其是一班年輕人。我覺得成件事係一個學習過程，令到我哋懂得點樣去參與社會事務，反思社會問題，而唔係純粹嘅發洩。」
「呢件事畀我哋好清楚咁睇到，政府巧取豪奪嘅手段。我喺IT界工作，明白發展係好重要，但係可持續發展更加重要，真正嘅發展應該兼顧環境同社會，唔係只着重金錢利益。」
「我今日嚟到呢度，係為咗支持呢班年輕人，佢哋令我諗起八九民運嘅北京學生，香港社會未來嘅希望，就係全靠佢哋。我對政府好反感，資料收收埋埋，市民都唔知政府做乜。」
