家啲數碼相架唔係睇相咁簡單，唔單止可以播歌播片，最新款嘅仲內置充電池，叉夠電可拎出街同friend分享，內置記憶容量高達2GB，隨時儲存逾千張照片。有啲仲有藍芽功能，方便手機直接傳相到相架。
留意屏幕解像度
但巿面咁多唔同牌子嘅數碼相架，都唔知點揀？消委會老友話，有啲消費者以為買電子相架越大越好，實際屏幕越大唔代表質素越好，一定要留意屏幕嘅解像度、光度、對比度、可觀賞角度；真係同買電視機冇乜分別。另外，大部份數碼相架只係支援JPG格式，少數型號支援BMP、GIF或TIFF，用家應留意自己慣常嘅儲存照片格式，再選擇支援該格式嘅相架。
老友又話，消委會啱啱測試咗巿面13款數碼相架，五款獲消委會推介，當中佔咗四款都係飛利浦品牌。
7吋以下嘅型號有飛利浦SPF2017（790元），可以播片播歌嘅SF2107（890元），同埋內置記憶容量達2GB嘅創見TranscendPF730B（671元）。7吋以上型號有內置充電池及藍芽功能嘅飛利浦SPH8008（1,790元）及SPF7010（1,990元）。