粵劇名伶紅線女，當年毅然離開繁華的香港，回歸祖國，更經歷重重政治風波。在港台製作的清談節目《品味人生》中，女姐細談當年在內地怎樣排除萬難，自己是怎樣的「活着」。女姐雖年逾80，但她的金嗓子仍絲毫不變，受訪時聲線嬌柔，連訪問她的導演嚴浩也面紅起來。
港台製作一連十集的清談節目《品味人生》將於今晚起，逢星期六晚上7時35分於無綫翡翠台播出，邀請著名導演嚴浩任主持，訪問對象全是出眾的圈中女性。頭炮嘉賓是粵劇紅伶紅線女，一連兩集節目分別會以「活着，再活着，更活着…」及「藝術令人不老」為題。
從小受粵劇藝術薰陶的紅線女選擇在其位於廣州的藝術中心接受訪問，女姐說：「我生命係屬於藝術，回顧一下幾有意思，當時係有啲受不了，但家話我聽係幾幸福。」女姐回歸內地發展，曾下鄉達13年，她說：「我係個演員，唔能夠為觀眾服務，應該係痛苦，嗰時喺雞棚餵雞，一個人餵幾百隻雞，吱吱吱……叫雞喎，叫佢嚟食，大風大雨我就練歌，因為冇人聽到。」
「悽慘就唱歌」
女姐指從小跟隨媽媽，媽媽性格開朗，怎樣凄凉也不會喊，她說：「我家都好少喊，悽慘就唱歌，我知有啲人想整我，當權有勢力，我唔堅強，整死我就唔抵，我唔愛錫自己實死，我頂硬上就有人想害我，都害唔到。」女姐指當年到內地發展，並非受馬師曾影響，她說：「我決定咗返嚟之前已同佢離咗婚好耐。」
對於毛澤東主席曾為女姐題字，她說：「其實係見面後，隔咗一年先寫，嗰時有個拍緊拖嘅人，因為佢返唔到嚟（指內地），話要死喎，嗰時香港都傳我死咗，毛主席知道呢件事情就話，啲人話你死，但冇死，你應該活着，於是就寫了『活着，再活着，更活着，要做勞動人民的紅線女』座右銘畀我，我家應該不愧係人民養育我嘅紅線女。」
嚴浩昨日在試映會上表示，今次是首次做主持及與女姐見面，笑言自己面紅又緊張，他說：「女姐好嬌柔，初初佢想喺二樓做訪問，導演都好頭痛，因為要再set燈，佢，之後又肯喎。」問他會否將粵劇改成電影找女姐合作？他說：「佢話唔拍粵劇，吳雨係佢契仔，吳雨會幫佢安排角色，要問吳雨先知。」有傳嚴浩會訪問狄娜？他稱狄娜現時身體不適，當然也希望訪問她。
採訪：溫敏芝
攝影：林德雄
