千秋王子撐《勁歌》玉木宏駕到除黑超冧港女 - 馮仁昭

千秋王子撐《勁歌》
玉木宏駕到除黑超冧港女 - 馮仁昭

憑日劇《交響情人夢》而為香港人認識,前日30歲生日嘅日本藝人玉木宏,噚日下晝坐飛機嚟到香港,準備喺今晚紅館舉行嘅無綫《勁歌金曲》總選做嘉賓。有30幾個以女性為主嘅fans就拉定橫額,用日文寫住『我愛你』同『生日快樂』喺機場等佢出嚟。

一班女fans見到玉木宏後,如蟻見蜜糖般興奮兼狂影偶像。

香港fans好有偶像心專登寫定橫額祝佢生日快樂。

親手接禮物

戴帽同埋太陽鏡着住牛仔褲嘅宏哥,見到咁多fans時都表現得好親民,出到接機大堂同助手即刻除低墨鏡,不停微笑兼同在場嘅fans揮手,搞到佢哋開心大叫。面對fans送嘅禮物,玉木宏亦來者不拒全部親自收晒,鬼咁識做令到在場所有fans都心滿意足。

日本星之中玉木宏都算親民,親手接fans嘅禮物之餘仲不停同佢哋揮手示好。

不忘讚記者

之後仲透過繙譯同在場記者傾偈,佢話:「好開心嚟到香港,雖然唔係第一次嚟,不過今次逗留時間比較長,可以試多幾味中國菜。」問到佢前日生日踏入30歲有乜願望,佢就好驚奇咁瞪大雙眼話:「好犀利呀,你哋咁都知。」讚完記者後就上車走咗,接送嘅車將佢送到入住嘅尖沙嘴洲際酒店休息。