80後聲勢浩大，民建聯都要吸納後生仔選票，民記議員黃容根別開生面，舉辦PSP打機GundamvsGundamNextPlus比賽，民記搞蛇宴、荔枝團見得多，搞打機咁新鮮，八方都係第一次見。
有別於一般益街坊活動，呢個打PSP比賽十分破格，參加者要自備遊戲機，打慣自己部機就手啲，咁都好正常，最奇係呢個比賽輸贏都冇獎品，即係純粹切磋，友誼第一；大家咪笑住，因為最爆笑係黃容根竟然將個比賽命名為「根damvsGundamNextPlus」！唔知根dam會唔會參賽？白鴿黨有高達，民建聯有根dam，確係旗鼓相當。