要數圈中衣着有品味的藝人，雷頌德夫婦肯定是其中一對典範。Mark曾獲得十大傑出衣着人士獎，太太Jade是模特兒，滿以為他倆也為兩歲多的囝囝雷鳴（Jack）着到靚、襯到絕先出街，原來除了某些場合外，平常對兒子的要求異常簡單，就是實用舒服唔花巧，為環保着舊衫。
記者：林佩婷
攝影：伍慶泉
只重品質不愛名牌
未做父母前，二人對童裝沒甚研究，唯一印象就是靚。「簡直係大人衫嘅縮細版。」但到了二人有了Jack後，身邊朋友狂送名牌BB衫，你以為愛靚的Mark會愛不釋手？大錯特錯！Mark認為名牌衫設計幾靚都好，小朋友着兩個月就不啱身，加上他認為小朋友不應有過份物質享受。「BB衫要揀棉質唔易敏感、着得舒服唔好太重，最緊要實用和夠暖，唔可以好似大人咁要靚唔要命，所以我哋唔會成日買衫畀個仔，咁對囝囝嘅教育都唔好。」
物盡其用交換着
最特別一點是他和一班父母朋友，因小朋友年齡不同，故經常交換童裝衫。每當Jack不合身的衣物，他就會送給朋友，同樣地，朋友也會送子女穿過的衣服給他。「一件衫只着兩個月，當中兩個月又可能只着一兩次，實在好浪費，我哋應該用盡件衫，着多啲先夠環保。」句句講實用環保，連叫佢為第一屆香港嬰兒服裝設計比賽暨黃巴士Catwalkbaby大賽中揀參賽衫，都對公開組冠軍的「虎兒」情有獨鍾。「睇落好舒服，質料又夠暖，細路仔着可愛又實用。」
囝囝獨愛鞋
Mark經常一身襯到絕的打扮，但Jack對衣服沒太大意見，反而對鞋仔卻有一定堅持。「有時你幫佢揀咗鞋仔，佢唔鍾意會自己揀過對，好似返學入課室要除鞋，佢一落堂第一件事就係衝去拎番對鞋嚟着，對新鞋尤其着緊。」每當穿上不舒服的鞋仔，Jack會以哭作抗議。「佢有日嬲爆爆咁，原來工人姐姐唔小心將對鞋左右掉轉咗。」不過Jack的哭攻並不是每次成功，若兩人發現他是無理扭計，照樣會由他哭，因為Mark認為凡事不能完全順着小朋友意思，否則很易寵壞。
環保虎兒夠暖
於剛過去的星期日舉辦的「第一屆香港嬰兒服裝設計比賽暨黃巴士Catwalkbaby大賽」，當天有27位BB以不同的造型及服飾行Catwalk，大部份設計以環保和實用性為主，加上BB的可愛樣貌，實在令Mark和Jade讚不絕口。
Mark最愛
名為「虎兒」的設計，Mark貪其可愛又保暖。
Jade心水
Jade覺得這件「天使」作品，萬聖節着最好。
其他作品
學生組亞軍「俄國娃娃」，將斗篷上的隱形鈕扣好，便變成環保袋。
公開組季軍「喜」，碎花上衣及旗袍領有中國味，紫色連身褲代表喜慶，腰間以平安結寓意祝福。
