科技發展不斷向前，多媒體資訊互通肯定係大勢所趨，最近內地加快推動電訊網、廣播電視網及互聯網「三網融合」，在股海掀起一陣炒風。由於內地對資訊流通特別敏感，隨着互聯網急速發展，滲透度越來越高，要將各類媒體訊息結合，需要更多監管及政策扶持，料有關細節年內將不斷出台，照咁睇，網股今年應該有排升。
近期Google（谷歌）醞釀退出中國市場，如果真係，市場普遍認為將造就百度（Bidu）及騰訊控股（700）乘勢坐大。有調查顯示，騰訊搜索引擎SoSo流量排在百度及谷歌之後，但增長迅速，若然谷歌真係唔玩中國市場，內地互聯網搜尋市場將變成「兩強」局面，難怪股海唔少人都睇騰訊目標價可見200元。
中國人口多、市場大，騰訊的「QQ」活躍用戶多達4.48億戶，有咁大個陣容支撐住，助長該公司盈利近年持續上升，截至去年9月底止首三季度，騰訊盈利增90%至36.47億元人民幣，相信全年盈利可突破50億元人民幣，大增逾七成。以騰訊業務條件及市場局面衡量，相信股價升抵200元指日可待。
方星俠