無綫的職員協會昨日發起紅衣行動，要求加薪及發放一個月花紅獎賞，雖然工業行動主要幫助幕後員工，但不少幕前藝人都發聲支持，絕不獨善其身。視帝視后黎耀祥和鄧萃雯齊聲表示有意見一定要表達，備受力捧的徐子珊更讚行動偉大。陳敏之則表示比較關注裁員問題，並謂寧願齊齊減薪，也不想有人被裁走。
電視廣播有限公司（無綫）職員協會昨日發起紅衣工業行動，要求無綫向員工派發一個月花紅獎賞及全體加薪5%，並調整底薪過低員工的工資，以達合理水平。昨日未見有藝人穿上紅衣到電視城，但不少藝人都表示支持工會行動。
徐子珊：行動好偉大
應屆視帝視后黎耀祥和鄧萃雯昨日在將軍澳電視廣播城錄影節目《星級廚房》，二人穿上黑白色服裝，卻支持紅衣行動，祥仔說：「勞資關係應該要多啲溝通，如果出咗問題嘅話，大家可以去磨合，相反如果有問題一直都唔出聲，反而會令事件惡化，結果可能仲差。」雯女則說：「工業行動的確增加溝通嘅機會，唔開心嘅嘢真係要表達，如果做得唔開心，就會欠缺動力，影響工作效率。」
徐子珊、黃宗澤和陳敏之等昨日在尖沙嘴出席活動，他們也支持工會行動，其中陳敏之說：「良性反映都OK嘅，唔太激進就得。」她又謂比較關注裁員問題：「我聽得較多嘅係裁員問題，我自己嘅立場係寧願個個減人工，人人有工開就最好。」
徐子珊說：「佢哋行動好偉大，我諗未必係呢一輩嘅人可以受惠，或者係下一輩嘅員工受惠，動機好好，我精神上支持佢哋。」黃宗澤則說：「希望大家都開心過肥年啦，我都支持佢哋表達意見，相信公司咁開明，唔會唔聽嘅。」陳山葱也說：「等公司知道佢哋有乜問題都好，如果我傾約，我都想加人工同續約條件好啲。」
安仔：加人工係好事
郭晉安昨日到商台宣傳時穿上黑色外套，但仍露出內裏桃紅色衫的邊緣。他自言滿意薪酬，且每年薪酬都有增加，他說：「要求加人工係件好事，但唔好太激烈表達意見，溫和啲傾，因為唔會喺壓力下成功嘅。」是否有員工偏向低薪？安仔說：「幾千個員工實會有差距，最主要睇番個工種，主角人工一定貴，因為有咁上下貢獻，壓力唔同一啲講兩句對白嘅演員。」
問安仔有指《72家租客》有些演員只收利是，他說：「如果係真就過份，但工作未必係睇錢，有時賺到經驗係無價。」
採訪：何慧斯、王連連、卓寶花
攝影：陳順禎