「錢唔係萬能，但冇錢就好頭痕！」湯茱迪喺《逃學威龍3之龍過雞年》就咁話過；不過，有時就算有多多錢都冇用。好似南華足主羅傑承甘願豪畀過百萬月薪，希望打動效力英超富咸嘅南韓國腳薛琦鉉「上山」，可惜最後一樣無功而還。
薛琦鉉經理人耍羅生
羅生前晚更新球隊嘅blog，宣佈南華斟介薛琦鉉失敗，並指後者會轉投一韓職球隊。羅生都忍唔住話，寫呢篇blog嘅時候好難堪︰「其實公開薛琦鉉嗰名之前，已取得99.99%把握，剩低嗰0.01%，理論上唔應該喺專業嘅足球世界中發生，但唔專業嘅事情都係發生咗。」
點解羅生咁講？我求大俠噚日問過南華教練金判坤，阿Kim就話成件事根本係薛琦鉉個經理人耍羅生︰「個經理人知薛琦鉉想踢世盃，未必會嚟港發展，不過又同富咸講南華斟薛琦鉉，仲叫富咸傳晒相關文件畀南華，搞到羅生認為有機。」其實報稱2.5萬鎊周薪（約32.5萬港元）嘅薛琦鉉，年屆31歲仲喺英超打滾，希望以好表現爭入國家隊，要佢轉踢港甲，心水清嘅球迷都知機會好微啦，家先知羅生原來俾人跣咗一鑊！
搵紅魔黑雙煞全觸礁
南華為咗打造無敵「少林寺」，近年不時想搵外國頂級球員加盟，可惜球星往往唔想降呢踢港甲，令呢啲消息變成「冇米粥」。羅生喺06年重投南華做足主後開始大搞，07年更先後傳出借用英超曼聯99年「3冠王」嘅「黑雙煞」約基同高爾、前巴西國腳查度同前日本國腳鈴木隆行，不過以上球星最終都冇成為「少林兵」；事隔兩年，羅生又爆過前利物浦球星科拿自薦加盟南華，但最終都係俾澳職嘅北昆士蘭風暴截糊。
羅生知其不可為而為之嘅精神，得到唔少網民讚揚，我求大俠都好佩服。其實最緊要係大家齊心提升港甲水準，到時肯定大把球星嚟港，重現7、80年代港足盛況！