全新一代的豐田Prado早於上年年中已聞會引入香港，今日終於有機會見真身，豪華新形象先叫人眼前一亮，新添多項高科技智能配備亦將實用功能大大提升，如減低搖晃的KDSS、四種道路模式的Multi-terrainSelect等，難怪代理留此寶作2010年頭炮的振聲勢之作。
記者：許維雅
攝影：林栢鈞
Model：Alia@Puremodels
斯文動感兼備
早於1951年ToyotaJeepBJ登場，已為豐田LandCruiser四驅系列奠下穩固的基礎，經過多年來蛻變，新一代LandCruiserPrado不再單是粗獷味甚重的爬山車，而係日漸成長為真正的CitySUV。重新設計的豪華外形可以話係進化的第一步，整體設計感覺更圓渾，收起粗膠邊頭尾泵把及後備掛尾車胎（只限豪華版）的設計，外表變得斯文得體。為了保持四驅車的剛陽味道，增高了15mm的車身、強化了肌肉感的車身線條都令Prado充滿霸王的氣勢，加埋由橫間變直間的鬼面罩、微微向上揚的菱形頭燈，全新形象的車頭設計亦應記一功。最重要係悉心新設計唔係只得外表無內涵，投射式低燈有自動轉向功能，而霧燈的廣闊度更大大增加一倍，再有8隻全新的車身顏色選擇，Prado的外表進化成功先過一關。
智能越野勝同級
形象要豪華升格，車廂內櫳的陳設鋪排可以話係評審的第二步，米白真皮座椅襯上啡色桃木點綴的中控台，已經勝任有餘。慢慢細心摸索，發現有支援藍芽及USB的6CD連9喇叭音響系統、多功能軚環、迷你車廂雪櫃及電動後排摺椅等豪華級SUV先有的配備，再下一城討人歡心。不過講到可以更勝同級對手的一着，就不能不數Prado新增多項的智能四驅越野功能，當中包括可以環迴四周的多角度監察系統，前後左右安裝了四個鏡頭方便監察附近障礙，其次全新研發的電子控制動態懸掛系統（KDSS），就有減低傾側角度及緩衝微細震盪的功用，仲有全面控制四輪如何驅動的中央差速系統、應付崎嶇路段的定速蠕行系統及有四種路面模式選擇的Multi-terrainSelect等，都完全顯示了豐田在四驅研發上的超卓成就。
規格
引擎：3,956ccV6DOHC雙VVT-i
馬力：275PS/5,600rpm
扭力：381Nm/4,400rpm
傳動：五前速電子自動波，四驅
車價：$639,440
查詢：23054555（豐田陳列室）