股王A成日都提醒敏妮，喺新聞裏面搵炒股靈感。前日，Google由於不滿北京黑客竊取維權同異見人士嘅資料，所以高調話唔再過濾搜尋器，仲話可能會撤出中國。
對於熱血嘅愛國人士，呢段係好新聞，但對於投資者，呢條同樣係好新聞，股王A就問：「如果Google撤出中國的話，有邊隻股受惠？」
掌握不同股份關係
答案：百度。外國貨冇得用，大家自然就要用番本地貨，供求關係，睇吓喺納斯達克市場上嘅百度（BIDU）股價升幅即時知冇答錯。
呢啲「條件反射」式嘅炒股方法，最重要係掌握不同股份嘅關係，舉一反三，一個消息出，即時要知邊啲股份會受影響，考反應考記性仲要心水清。
另一單新聞係俄鋁（486）上市，由於俄鋁嘅負債驚人，所以監管機構淨係畀大戶參與，一手買賣價唔可以低過20萬蚊，認購金額唔可以少過100萬蚊，總之就落閘唔畀散戶玩。雖然有股票行提供孖展，但只係借七成。
計吓數，認購俄鋁同買層細價樓短炒冇乜分別，樓價百餘萬，首期三成，做七成樓按，但分別嘅係買層物業，你仲可以睇過個單位先扑槌，就算睇錯要坐艇，層樓仲博可以有租金收入幫補吓。至於認購俄鋁一旦坐艇，之前已經有分析員估，俄鋁負債咁高，睇怕呢幾年都唔使旨意收到股息。
新股排隊上市，就算唔抽呢隻可能會賺少咗，不過，至少瞓得安樂，所以都係留番啲大戶玩啦！
溫敏妮