「準備緊新一年財政預算案嘅財政司司長曾俊華，期待收到你嘅意見。」呢句熟口熟面嘅對白，相信唔少市民都喺電視同電台聽過，之唔係財爺鬍鬚曾宣傳每年一度財政預算案嘅廣告對白。來年度財政預算案下個月出爐，政府做樣都要做啲諮詢宣傳，會翻用舊年試過嘅漫畫，主角冇變，幕後製作人就換班，對象係介乎15至25歲嘅80後。睇嚟財爺冇諗住一本漫畫走天涯，而係出本漫畫呃小孩！
為咗令後生仔關注預算案，財爺上年首次引入漫畫作為宣傳媒介，搵本地著名漫畫家清兒操刀，可惜官樣漫畫諸多掣肘，因此反應麻麻，今年由媒體製作人何故負責呢本《今日工程．明日繁榮》嘅預算案漫畫，唔知o靚仔細路受唔受。
何故經常寫漫畫文化評論，有唔少「粉絲」，今次負責編劇，由方米高畫漫畫，佢指財爺辦公室指定要用番上年漫畫主角日仔，所以創作有唔少限制，加上製作期僅三個禮拜，唔到你慢工出細貨，趕到deadline已經萬幸。
「打底」說難人人滿意
漫畫目標讀者係80後青年，何故設定主角日仔剛考入大學工程學院，想上莊競逐工程學會副會長，過程中少不免要接受師兄、同學質詢，特別係牽涉到工程學會財政預算方面嘅問題，故事就由制訂學會財政預算遇到嘅難題，引伸到政府財政預算呢個主題，日仔好似上集咁又有奇遇，就係重返三國時代，同諸葛亮呢啲蜀國重臣一齊籌劃興建都江堰城，勁有《巴不得爸爸》feel。
何故透露財爺畀咗唔少意見，最希望漫畫可以畫出制訂預算案有好大難度，更加冇可能令到人人滿意呢個重要訊息。好多80後都有上莊經歷，何故諗到用呢個背景表達政府個idea，八方都服咗佢，反而財爺真係多餘，係人都知預算案唔易寫，唔可以滿足所有人啦，既然係咁，何必諮詢？咁搞法似係幫自己閂定後門，想市民鬧少啲。呢本漫畫印30,000本，除咗透過中學派發，各區民政事務處亦有得攞。
mailto:[email protected]