澳洲面積大到無倫，將香港放在澳洲地圖，就好似放一隻蟻落一塊大酥餅上，但呢隻蟻居然內藏人口七百萬，係澳洲人口三分之一，可見香港人煙之稠密，冇法子唔住在高樓大廈，而澳洲人就一家佔一間平房，香港一啲所謂豪宅house，面積細小，在黃金海岸根本不入流。但點解香港人平均壽命之長，係世界上數一數二咁長呢？想極唔明。
馬主團去到黃金海岸，住在附設賭場嘅Conrad，碰上香港有星期三夜馬，梗係入賭場落注喇。賭場內有一偏廳，冇乜澳洲人在，成班亞洲人匯集賭馬，大電視播完賽狗就播南非賽馬，跟住鏡頭轉往香港快活谷，大電視旁邊嘅小電視就播NBA籃球賽，令人眼花撩亂，如果乜都要賭，可能輸死未天光！賽馬賠率有三瓣，一瓣係快活谷賠率，一瓣係新南威爾斯賠率，一瓣係黃金海岸賠率，醒目仔可以揀，馬主Ｎ係澳洲人，有雪梨投注戶口，睇見雪梨方面賠率較高，就打電話到雪梨投注。佢嘅心得就係，澳洲人最識得柏寶，故此柏寶啲馬賠率特別低，澳洲人唔識蔡明紹、梁家俊，故此如果蔡梁兩位有機會嘅話，在雪梨落注有着數。馬主Ｈ就唔識咁多，輸咗幾場之後，一心一意買冼為堅博士隻「友誼奧運」，黃金海岸賠率係七點九倍，香港賠率係五點幾倍，結果順利勝出，而且賠率好過香港咁多，收錢自然笑呵呵！
如果賭注有得套戥嘅話，可以搵大錢嘅噃。澳洲嘅莊家（bookie）係合法攞正牌嘅，如果佢哋收到啲投注熱買柏寶嘅話，其實可以放一個越洲飛彈過嚟香港馬會彩池，買晒柏寶，作平倉之用，萬一柏寶真係贏出，香港賠三倍，澳洲賠兩倍，中間賺到笑啫。明乎此，唔怪得賀賢柏寶呢對澳洲人騎練孖寶嘅馬，經常有臨場瘋狂落飛現象，有時贏，有時輸，其實可能係澳洲莊家做oddsarbitrage（賠率套戥），道理與Ａ股准許沽空之後，對冲基金會買香港Ｈ股，沽空上海Ａ股一樣。酒店賭場雖然係廿四小時開放，但賭馬櫃台在晚上十一時（香港九時）就收工，冇得玩。惟有上房睇電視，點知電視有一個台直播香港賽馬，於是又可以邊睇邊打電話返香港作電話投注！