香港人愛看漫畫，但土炮「公仔書」題材不是打交就是社團，離不開筋肉人劈來劈去，冇人畫好似日本嘅《加治隆介之議》、《英雄本色》。近日社民連擁躉Cuson畫咗十幾版《五區公投》漫畫解說公投意義，反響甚大，反觀財爺已連續第二年透過漫畫諮詢預算案意見，始終畫虎不成，Cuson指出，用漫畫說政治十分難，如果唔花心思令內容有趣一啲，唔慌有人睇。
Cuson話其實講公投係幾悶嘅題材，勝在有毓民、長毛等政治明星做主角，令一般人都有興趣，預算案漫畫冇用名人做主角，自然蝕底好多，「好似教育電視咁，一味說教，咪唔好睇囉。」話雖如此，佢認為香港政治漫畫有可為，因為政治爭議越來越多，後生仔更關心政治，相信今年有更多政治漫畫登場。