大市前日急跌，噚日又彈唔起好似有暗湧，但其實恒指過去幾個月都只喺21000至23000之間上落，個市要真正升穿23000兼企穩，至好話再展升浪，否則短期內仍係一板一板炒。最新係資金流出中港地產股，轉投工業半新股，好似先進半導體（3355）、大昌微線（567）非常火熱，連德昌電機（179）都「醜女大翻身」，投資者要小心口味一轉嘅回吐壓力。
口味轉得快，不過唔變嘅係，半新股仍好受市場歡迎，優質新股當然更加搶手。講緊係招股中嘅南戈壁（1878），比起蒙古能源（276）更早有煤出產，去年8月已正式賣煤，09年尾虧損收窄，預計全年經營虧損唔多過5300萬美元。投資者決定係咪認購時，要有心理準備買嘅係公司前景而唔係股息，因為即使轉虧為盈後，公司話會再發展新項目，「食息一族」請不要申購，以免阻人發達。
買前景 咪望食息
正正因為公司未有錢賺，先要上市集資30億元，大部份資金用嚟擴大產能、發展運煤嘅鐵路基建，同提升煤炭質素嘅洗煤設備，屆時出廠煤價可望提升。公司去年頭9個月銷售成本2098萬美元，足足佔總收入八成以上，平均每噸賣28.76美元入面，總現金成本就有成15.96美元，主要因為運輸困難。不過，受國家支持，今年有一條鐵路直落中國連接鐵路網，到時運煤成本將大大降。
買公司前景最忌係信錯人。中投係佢嘅前期投資者，去年11月率先用5億美元向公司認購可換股債券，換股價8.88至11.88元加紙，折合約66.6至89港銀，比招股上限價133.5元，折讓33%。睇落折讓好大，但上市會令中投股權被攤薄10%，算係合理。
除咗中投嘅13.6%，星級投資者仲有淡馬錫（1.7%），大股東艾芬豪（IvanhoeMines）持有58%，有半年禁售期，令上市後街貨唔夠27%。但由於公司每股有形資產淨值只係24.11港元，呢次定價好貴，保薦人話考慮到公司喺加拿大嘅股價，唔可以賣咁平喎。講真，明知即將喺香港第二上市，儍嘅都識先炒起加拿大個價吊高嚟賣啦。
胡孟青