邵氏七仙女之一的方盈，與胰臟癌搏鬥近一年後，昨晨不敵癌魔去世，享年63歲。好友馬海倫昨日獲方盈前夫通知，得悉噩耗，泣不成聲憶述故友生前點滴。
昔日邵氏女星方盈，原名倪芳凝，與胰臟癌搏鬥近一年，昨日不幸去世，享年63歲。馬海倫昨日獲方盈前夫、奇華老闆黃錫祥通知好友死訊，她暫時仍未接受這個噩耗，她泣不成聲：「呢三個月走咗兩個好朋友，一個係陳鴻烈，一個係方盈，大家都係邵氏時代識於微時嘅朋友，呢份友情係冇得變。」
方盈雖多年前離婚，但前夫黃錫祥對她有情有義，發現患上胰臟癌期間，黃錫祥一直體貼照顧，馬海倫說：「方盈健康一直唔錯，直至去年中發現自己患上胰臟癌，佢仍然樂觀面對，好積極去接受治療，前夫一家都從旁支持照顧。」
為人樂觀開朗
馬海倫續說：「不過，方盈同我哋講治療期間好疲累，加上體質較弱，流感又正值高峯期，所以我哋都唔方便打擾，佢好多時會透過電郵、短訊同電腦視像同我哋保持聯絡，講吓近況。」馬海倫表示對上一次聯絡已是兩個月前，她說：「佢當時仲好精神，胰臟癌都係頭號殺手，我哋都做咗心理準備。」談到方盈的為人，馬海倫讚不絕口：「佢份人好樂觀開朗，係大家嘅歡樂組組長，佢離咗婚同前夫都一直保持良好關係，互相關心，上次凌波結婚周年慶祝，方盈都特別準備咗奇華禮包送畀大家，平時有乜嘢新款餅食推出，佢都第一時間畀大家試吓，佢咁就走咗，大家都唔捨得佢。」
復出曾任美指
方盈十四、五歲加入電影圈，後嫁予奇華餅家少東後退出影圈，離婚後復出任美術指導。近年因病經常出入醫院，她的子女希望低調處理亡母後事。方盈初登銀幕之作是林黛主演的《妲己》，扮演宮女。62年擔演何夢華執導的《七仙女》，其清麗純真形象令人留下深刻印象，故甚少緋聞。68年方盈與奇華少東黃錫祥結婚，70年息影，育有一子一女，惜於78年離婚。
76年方盈應佳視邀請復出擔任《電影圈》節目主持，80年代中期起擔任電影美術指導，《川島芳子》令她一舉成名，並憑《海上花》獲第23屆金馬獎最佳服裝設計。近年專心從事室內設計工作，去年底更推出《自在住》一書分享家居佈置的心得。
採訪：比華利
