擁有35D豪乳亞姐袁小曼，舊年同任職利嘉閣地產董事總經理嘅男友廖偉強撻着後，近期高調出巡晒恩愛，廖偉強雖被爆未辦妥離婚手續，但佢已同袁小曼喺北角築愛巢，過住甜蜜同居生活，即將約滿亞視嘅袁小曼因為有大水喉射住，已叠埋心水唔續約，等男友搞完離婚就入宮，閒時學炒樓賺私己錢。
曾搞辦公室婚外情
袁小曼同男友廖偉強連日高調拍拖，表現風騷，仍未離婚嘅正印廖太當然嬲到震，佢好友仲爆料話廖太被激病，前日仲入咗養和吊鹽水，可憐廖太孤身住院，但久咳未癒嘅袁小曼就有男友陪睇中醫，明顯幸福得多，袁小曼噚日仲話食咗藥好番好多。不過當馮仁昭問到正印廖太入醫院一事，袁小曼一於懶理咁話：「我唔想回應啦，好想件事盡快結束。」隨即掛線，一改連日嘅合作態度。雖然袁小曼要封嘴避談戀情，但佢嘅Facebook就上載咗大量同男友嘅親密照，照片中兩個攬到實一實，sweet到痹。
此外，噚日有讀者報料指廖偉強非常風流，曾背妻同下屬搞婚外情，搭上咗鰂魚涌分店嘅同事，其後被廖太發現，其妻曾將廖偉強嘅行李送到佢喺鰂魚涌工作嘅辦公室示威，逼佢斬纜。