立法會平時開會悶場居多，呢兩個星期卻好戲連場，毓民同金勞詹上星期喺議事堂內爆粗鬧大交，唔少人回味再三，原汁原味魚蝦蟹由頭拍到尾嘅有線新聞攞晒彩，反而一向負責轉播立法會會議嘅香港電台就蝕晒章，原來佢哋用立法會系統收音，當日兩人一開拖，立法會職員即刻熄咪，搞到港台有畫冇聲。
今日煲呔出席立法會答問大會，由於火藥味甚濃，為免再走雞，求人不如求己，港台決定用私家咪，喺錄影機加裝外置咪，就算立法會熄咪，都可以收到現場聲音，唔會錯失任何精采鏡頭，換言之議事堂內有任何炒蝦拆蟹問候爹娘聲音，市民都可以如實睇到聽到。
港台發言人話加裝收音咪係要真切反映議會實況，但強調唔係第一次咁做，以前一啲重要會議亦有類似做法，日後亦會視乎情況去採用現場收音做法。