在拍賣會買馬，最怕俾人托價，但如果冇人同你爭，又怕邊度有咁大隻蛤乸隨街跳吖，譬如見到一隻好眉好貌，血統不錯嘅馬，叫價去到四萬澳元就冇人叫落去，馬主H心郁郁想舉手指示意，執吓平貨都好吖，但俾馬主N㩒住，佢話：「澳洲佬唔叫價，或者知道隻馬有內在毛病呢！」可能係嘅，因為另一隻同父系馬，長得模樣不錯，三幾下已經嗌到上十七萬澳元，競投氣氛熱烈，與前一隻馬嘅拍賣情況完全不同。
買馬有好多學問，如果睇中一隻，跟住真係買到，而隻馬來到香港之後可以係「蓮華生輝」嘅，咁咪好發達？可惜在百分之九十九情況之下，買到隻馬返嚟，贏到三四場中班賽事，已經幾好彩咯。大馬主莎莎郭近兩年改變買馬策略，在紐西蘭買五隻週歲馬，訓練之後先至揀一隻來港，結果五隻馬之中，揀中最便宜嗰隻作價三十五萬港元，來港參賽，六戰五勝一亞，呢隻馬就係「締造美麗」！在神奇百萬拍賣會中，香港馬會買咗幾隻，每隻都作價二十餘萬澳元（一百五十萬港元）以上，呢幾隻馬到今年十二月中相信會在港拍賣，到時可能搶到三四百萬港元一隻！
參加拍賣會之餘，QIC招待香港馬主團到佢哋擁有嘅新型大商場RobinaTown參觀，由專人迎接，物業經理帶隊遊商場。據物業經理向馬主H介紹，RobinaTown離開遊客中心區SurfersParadise海邊約十五公里，佔地三十五公頃，但商場建築面積只係十二萬平方米多啲，地積比率低得好緊要，香港人見慣高樓大廈，梗係覺得澳洲人浪費土地用途啦！嗰度嘅停車場一層過，有幾條街咁長，但嗰日係星期四晚，居然全部滿座，foodcourt內人頭湧湧，有啲曼谷、吉隆坡feel，奇怪也。物業經理話成個黃金海岸嘅人口係六十萬人，逢星期四有latenightshopping（晚上延長開舖時間），直至九時，平時就五點半收舖，故此逢星期四就有好多顧客遊商場。RobinaTown的確係一個好舒適，應有盡有嘅商場，以前由私人興建，因面臨破產而由QIC買入，現在已經升值不少。到黃金海岸旅遊，如在海邊、賭場玩到悶，要遊商場嘅話，遊一個RobinaTown已經足夠。