鍾鎮濤（阿B）女友范姜（FanFan）前天在養和醫院剖腹產下第二名女兒，榮升家姐的鍾懿沒有呷醋，還大讚妹妹是「Thebestbaby」，她與父親錄了一首《閃閃星辰》送給媽咪及妹妹，阿B前晚在醫院播放該曲，范姜感動得流下眼淚。
已有一子兩女的鍾鎮濤，前天再多一個寶貝女，他與女友范姜為新生女兒取名Eloise，阿B開心之極，還將女兒照片上載facebook，向親友公佈喜訊，Eloise與鍾懿一樣有一對小酒窩，又肥又可愛。
阿B昨天在醫院接受訪問時，仍難掩興奮心情，連路過市民都上前祝賀，他說：「一路笑到收唔到聲，FanFan噚晚開心到唔捨得瞓。個英文名係我同媽咪一齊諗嘅，中文名就仲未決定，我諗咗幾個，有啲係三個字嘅，叫國好、國贏或者國掂都得，可能第時搵學校會易啲。」
產房忙碌做導演
阿B謂帶着攝錄機入產房陪產，忙得像做導演一樣，要顧着鏡頭，又要顧及女友生產時的感受，他續說：「我拍嘅嘢唔會血淋淋嘅。」阿B的大兒子鍾嘉浚及女兒鍾嘉晴均身在外地讀書，而5歲小女兒鍾懿現榮升家姐，她抱着妹妹不肯放手，阿B說：「早排同佢去錄音，諗住留住佢細個把聲，咁不如錄首歌送畀媽咪同妹妹啦，畀佢唱咗首《閃閃星辰》囉。」
《閃閃星辰》是阿B作個人發展後的第一首廣東歌，今次他重新編曲，為女兒監製及和音，前晚范姜產女後，阿B播給她聽，她即感動流淚，阿B說：「送首歌畀佢好過送個袋呀。」
暫未打算娶范姜
阿B表示今次范姜又產巨B，也會餵母乳，Eloise重3.68千克（約8磅2安士），但也不及鍾懿出生時的3.86千克重，二人不打算再生，阿B笑言：「係都唔使佢生，我叫第二個生啦，哈哈，講笑啫，呢個已經係上天送畀我嘅禮物，再生要叫我做爺爺o架喇，唔生喇。」問阿B會否打算與范姜結婚，他謂：「未計劃呀，一樣一樣嚟，一齊咁耐咯，結唔結都冇所謂啦。」問他要對女友說甚麼？阿B笑說：「辛苦晒！」
昨下午鍾懿到達醫院，她應記者要求即席唱兩句《閃閃星辰》，還大讚妹妹是Thebestbaby，問她願不願意將所有玩具送給妹妹，鍾懿想了想後說：「媽咪已經買咗個bearbear畀妹妹，不過今日唔記得帶嚟呀。」她見記者拍照，即攬着阿B錫錫，問她可會像錫父親一樣錫媽媽，鍾懿即對着鏡頭送飛吻，又做出勝利手勢，十分可愛。
採訪：張俊銘
攝影：陳慧安