記得陳年港產片《賭神》，「賭神」高進500鋪玩玉戒指扮偷雞，裝「新加坡賭王」陳金城呢隻老狐狸；阿仙奴領隊雲格都興玩呢味，簽慣十零歲花o靚，今次突然唔玩幼齒改玩「耆」兵，準備簽入蘇甘保呢位35歲舊將。
周二阿仙奴預備組作客韋斯咸預備組，原本一場冇乜特別嘅比賽，出現一個熟悉嘅名字：蘇甘保。呢位中堅自從同諾士郡解約，已經跟咗兵工廠操練幾個星期；今次代表阿仙奴預備組正選上陣，打足上半場，球隊亦以4:2大勝對手。
「好似從未離開過呢度」
蘇甘保雖然已經唔係o靚仔，但賽後就好興奮咁講：「呢種感覺正到爆，45分鐘對我嚟講已經足夠，久違嘅熱情又番晒嚟，我嘅心情就好似從未離開過呢度咁；雲格呢個主意真係好，佢近距離睇過我比賽，點會係儍仔！」
06年歐聯決賽輸畀巴塞隆拿後，蘇甘保就自由身轉投樸茨茅夫，幾經波折今次再當「兵」，據報佢可獲一紙兩萬鎊（約25萬港元）周薪嘅合約到季尾，最快仲可能喺下周日作客保頓嘅英超比賽上陣。
英國《太陽報》就話，阿仙奴今次收購係「Sol『Gamble（賭博）』」，我求大俠又覺得冇咁嚴重，事關兵工廠又唔使畀轉會費，最多都係白支人工啫；睇番阿仙奴1月賽程，又難怪雲格要搵即食兵嘅。
英超賽會將阿仙奴對保頓嘅補賽，排咗喺下周三，即係阿仙奴4日之內要兩鬥保頓；連埋英足盃，兵工廠由17號至31號，15日之內要打5場波，當中仲有作客維拉、主迎曼聯呢啲硬仗。而可以串演中堅嘅桑治又去咗踢非國盃，佐羅有排先傷好、辛德路斯信心盡失兼公開想走，點都要搵個人做加拿斯同華美倫嘅後備。
基昂：後防老啲唔係問題
前阿仙奴中堅基昂都舉腳贊成蘇甘保回歸，家出任兵工廠球探嘅基昂話：「當年我37歲，都可以幫阿仙奴全季保持不敗攞冠軍，後防老啲唔係問題；以蘇甘保嘅經驗，保持比賽狀態嘅話，入選埋英格蘭世界盃大軍都唔奇。」踢世界盃就難啲，做吓英超後備，相信都難唔倒蘇甘保。