史上最精簡　Keyboard係電腦

一體式電腦聽得多，如果電腦唔同屏幕結合，改為同鍵盤一體化，又可以點玩呢？啱啱舉行完嘅CES展覽中，ASUS就展出咗唔少新產品，其中最具創意首選呢款EeeKeyboard，飛甩屏幕，單憑同一般鍵盤差唔多大小嘅主機，就可以上網同打吓文件，話唔定仲Hit過Netbook！

記者：許福合　
攝影：黃子偉

內置5吋Touch芒

從外觀睇，除多咗個5吋觸屏，真係同普通鍵盤分別不大！基本電腦操作，可以在觸屏做晒，連滑鼠同Stylus都可以慳番。屏幕嘅位置放喺鍵盤右邊，而且係直身長方形，所以ASUS特別設計咗個UI畀佢，睇落就似手機介面，直接篤軟件圖示就可以開啟程式，例如有YouTube、Gmail、瀏覽器、Skype及Facebook等，亦有文書軟件，直接在左邊嘅鍵盤打字，就可以輸入文字。

■將UI關上，見到原來行緊XP。

■售價及推出日期未定

■亦可用HDMI或VGA接駁屏幕。

■UI介面有齊常用瀏覽器、YouTube及MSN等程式。

■還有一頁用來放遊戲，不過只有幾款。

■Tools內有常用文書、日程及系統設定。

■還有一頁放字典等學習用工具。

HDMI駁芒

將這個UI程式停止後，就會見到原來係行緊WinXP，不過據講規格仲未Final，話唔定最終會係Win7都唔定！視窗模式時畫面因為係「直度」480×800，所以畫面只Show到半個，睇落就只有視窗畫面嘅左邊，所以開番專用UI介面較實用。EeeKeyboard本身已內置電池，可以拎住周圍走，亦內置Wi-Fi、藍芽及LAN等網絡介面，至於若嫌個芒太細，仲可以用VGA或HDMI，將畫面送到大芒上顯示。想再簡單啲，跟機仲有個畫面轉送器，可無線與EeeKeyboard連接，再經HDMI接駁電視屏幕。